Gal Gadot, Skarlett Yoxansson, Nikolas Keyj va kinolarda tashqi ko‘rinishi kompyuter yordamida o‘zgartirilgan boshqa yulduzlar (foto)

Ba’zida aktyor va aktrisalar o‘z personajlariga moslashishi uchun qurbonlik qilishiga to‘g‘ri keladi. Agar ularning harakati yetarli bo‘lmasa, maxsus effektlar yordamga keladi.

Gal Gadot

“Mo‘jiza-ayol” filmini suratga olish paytida hech narsani o‘zgartirishga hojat bo‘lmagan. Ammo keyinchalik bir nechta sahnani yakunlash kerak bo‘lganda aktrisa besh oylik homilador bo‘lgan. Uning homiladorligi sezilmasligi uchun kompyuter yordamida uning avvalgi qomati chizilgan. Buning uchun Galning qorin qismiga yashil rang uchburchak qog‘oz yopishtirib qo‘yilgan. “Bu kulgili ko‘rinardi, − deydi Gal. – Yirik planda hammasi yaxshi edi, kichik tasvirlarda esa homilador Kermit qurbaqasiga o‘xshardim”.

Genri Kavill

Aktyor bir vaqtning o‘zida “Uddalab bo‘lmas topshiriq” hamda “Adolat ligasi” filmlarida rol ijro etgan. Birinchi filmda u mo‘ylovini o‘stirishi kerak, ikkinchisida bu kabi ko‘rinish kerak bo‘lmagan. Kino kompaniyalar orasida bir necha muhokamalar olib borilib, nihoyat o‘stirilgan mo‘ylovni kadrlardan qirqib tashlashga kelishilgan.

Uesli Snayps

“Bleyd 3” filmida aktyor rejissor Devid Goyer bilan kelishmovchilikka uchragan. Suratga olish qiyin kechgan bir vaqtda aktyor rejissorni tinglashni ham xohlamagan. U muhim sahna uchun ko‘zlarini ochishni iltimos qilganda, Snayps rad etgan. Natijada yuzdagi ifodani kompyuter grafikasi yordamida chizishga to‘g‘ri kelgan.

Nikolas Keyj

Aktyorning yelkasida tatuirovka bo‘lib, 2007-yilda suratga olish ishlari boshlanganda, uni qanday bo‘lmasin yashirishga to‘g‘ri kelgan. Bu vaqtda uning yelkasiga biror kiyim tashlash sahnaga to‘g‘ri kelmagan. Shuning uchun ham tatuirovka kompyuter yordamida o‘chirilgan. Keyinchalik aktyorning mushaklari ham grafika yordamida yasalgani haqida mish-mishlar paydo bo‘lgan, ammo Nikolasning hamkasblari hammasi haqqoniy ekanini ma’lum qilgan.

Skarlett Yoxansson

Aktrisa uchun “Zirhdagi arvoh” filmida ko‘proq sharqona xususiyatlar o‘ylab topilgan. Bu esa yirik tasvirlarda yaqqol namoyon bo‘lgan.