Qashqadaryo viloyatining Qamashi, Yakkabog', Shahrisabz, Kitob, Chiroqchi, G'uzor, Nishon tumanlari va Shahrisabz shahrida elektr taʻminotida 16-18 soatgacha, qolgan tumanlarda esa 8-10 soatgacha ham uzilishlar sodir bo'lmoqda. Bu haqida "Daryo"ga "Qashqadaryo hududiy elektr tarmoqlari" AJ axborot xizmati maʻlum qilgan.

Taʻkidlanishicha, yagona energetika tizimida quvvat tanqisligi yuzaga kelganligi sababli tizimda turg'un ish rejimini saqlash, sodir bo'lishi mumkin bo'lgan avariyalarning oldini olish maqsadida «Milliy elektr tarmoqlari» AJga qarashli dispetcherlik xizmatlari tomonidan yuqori kuchlanishli havo elektr uzatish tarmoqlarida elektr energiyani cheklash va avariyaga qarshi avtomatika tizimlar ishga tushirilmoqda.

"Xususan Yakkabog'-2 yuqori kuchlanishli elektr uzatish tarmog'ini deyarli muntazam ravishda cheklashga o'chirilishi natijasida ichimlik suvi taʻminoti tizimiga qarashli nasos stansiyalarini elektr energiyasi bilan taʻminlash imkoni bo'lmayapti. Bu esa o'z navbatida viloyatimiz hududlarida ichimlik suvi taʻminotida ham uzilishlarni keltirib chiqarmoqda.

"Milliy elektr tarmoqlari" AJga qarashli dispetcherlik xizmatlari tomonidan cheklashga o'chirilishi yoki avtomatika tizimlari ishlashi oqibatida elektr taʻminotida cheklovlar kuzatilayotgani hamda uning sabablari yuzasidan OAV orqali izoh berib borish bilan bir qatorda elektr taʻminoti bo'yicha bildirilayotgan eʻtiroz va noroziliklarni bartaraf etish maqsadida elektr energiyasi yetkazib berishning sutkalik topshirig'ini oshirishga amaliy yordam so'rab mutasaddi tashkilotlarga murojaat etib kelinmoqda", deyiladi masʻul tashkilot axborotida.

Eslatib o'tamiz, avvalroq Qarshi shahrining ayrim hududlari olti soatlab elektrsiz qolayotgani xabar berilgandi. Shundan so'ng, viloyat hokimi tizimdagi muammolarni bartaraf etishni so'rab Bosh vazirga murojaat qildi. Bosh vazir vaziyat ikki kunda o'nglanishini bildirdi. Shundan keyin ham Qashqadaryoda elektr uzilishlari davom etdi va hududda suv taʻminoti ham to'xtab qoldi.