Davlat aktivlarini boshqarish agentligi huzuridagi “E-IJRO AUKSION” elektron savdo maydonchasida boshlangʻich narxi 1 soʻmlik davlat aktivlari savdosi qizgʻin oʻtkazilmoqda. Buni oʻtgan hafta davomida 14 ta boʻsh binolarning realizatsiya qilinganida ham koʻrish mumkin.

Onlayn auksionda boshlangʻich narxi 1 soʻm boʻlgan 14 ta davlat mulki 1,3 mlrd.soʻmga sotildi va ushbu auksionlar gʻoliblariga jami 32 mlrd.soʻm miqdorida investitsiya kiritish hamda 267 ta yangi ish oʻrinlarini yaratish majburiyati ham yuklatildi. Bu haqda “Elektron onlayn auksionlarni tashkil etish markazi” DUK PR-xizmati maʼlum qildi.

«Yuqori narxlarda sotilgan davlat obyektlarining ayrimlari bilan tanishing:

1. Namangan viloyati, Kosonsoy tumanidagi boshlangʻich narxi 1 soʻm boʻlgan sobiq silga qarshi kurash dispanser binosi 505 mln.soʻmga sotildi. Davlat obyekti 6 sotix yer maydoniga ega boʻlib, gʻolib 12 oy muddatda 800 million soʻm investitsiya kiritib, mehmonxona faoliyatini tashkil etishi va kamida 12 ta yangi ish oʻrni yaratishi lozim.

2. Andijon viloyati, Shahrixon tumanidagi boshlangʻich narxi 1 soʻm boʻlgan sobiq maktab filiali bino-inshootlari 74 mln.soʻmga sotildi. Auksion gʻolibi 12 sotix yer maydonida joylashgan mazkur davlat obyektiga 6 oy muddatda 300 million soʻm investitsiya kiritishi hamda kamida 15 ta yangi ish oʻrni yaratishi lozim.

3. Namangan viloyati, Kosonsoy tumanidagi boshlangʻich narxi 1 soʻm boʻlgan Namuna QVP bino-inshootlari 449 mln.soʻmga sotildi. Davlat obyekti 11 sotix yer maydoniga ega boʻlib, auksion gʻolibiga 12 oy muddatda 500 million soʻm investitsiya kiritish hamda kamida 12 ta yangi ish oʻrni yaratish majburiyati yuklatiladi.

Siz ham mazkur auksionlarda ishtirok etib, davlat aktivlarini ochiq va shaffof usulda yutib olishingiz mumkin. Ayni damda “E-IJRO AUKSION” savdo maydonchasida 12,2 ming tadbirkorlik faoliyati uchun 151 ta boʻsh turgan davlat aktivi va 3,2 ming yakka tartibda uy-joy qurish uchun yer uchastkasi savdoda turibdi» deyiladi xabarda.