Samarqand shahridagi "Xalqlar do'stligi va diniy bag'rikenglik" muzeyida O'zbekistonda xizmat ko'rsatgan madaniyat xodimi Rashid Temurov tavalludining 110 yilligiga bag'ishlangan shaxsiy rangtasvir asarlari ko'rgazmasi tashkil qilindi. Ko'rgazmada rassomning muzey-qo'riqxona fondida hamda oilaviy shaxsiy jamlanmasida saqlanayotgan oltmishga yaqin rangtasvir asarlari namoyish qilinmoqda. 

O'zbekiston tasviriy sanʻatida manzara janri o'ziga xos jihatlari bilan ajralib turadi. Rassom qadrdon yurt jamolini tasvirlash orqali tabiatga, milliy urf odatlarga, go'zallikka muhabbat uyg'otish kerak degan fikrni talqin etadi. Bu janrda ijod qilgan rassomlardan O'.Tansiqboyev, N.Karaxan, P.Benkovlar bilan bir qatorda ona yurt mehrini ranglar orqali tarannum etgan Rashid Temurovning ijodi ham alohida tahsinga sazovor.

- Rashid Temurovning asarlari hozirgi kunda dunyoning turli mintaqalarida, xususan, Davlat Tretyakov galeriyasi, Sharq xalqlari davlat muzeyi, Norilsk va Tselinograd hamda mamlakatimizdagi turli muzeylarda saqlanadi, - deydi  O'zbekiston madaniyati tarixi davlat muzeyi sanʻat bo'limi mudiri Safura Ro'zimurotova. - Jumladan, "Samarqand" davlat muzey-qo'riqxonasi fondida rassomning qirqqa yaqin asarlari saqlanyapti. Rassom tomonidan Samarqandning so'lim bog'lari, sershovqin bozorlari, tarixiy obidalari tasvirlangan "Samarqand obidalari", "Afrosiyobda bahor", "Samarqanddagi qovun bozori", "Urgut kulolchiligi", "Bibixonim hovlisida", "Shohizinda", "Registon ko'chasi" kabi asarlarida yurtga muhabbat ohanglarini ko'rish mumkin. Ushbu asarlar shu kungacha ham muzeyda tashkil qilingan ko'pgina ko'rgazma va ekspozitsiyalarda namoyish etilib, keng jamoatchilikning eʻtirofiga sazovor bo'lgan. 

Ko'rgazmaning ochilish tadbirida muzey xodimlari, rangtasvir sanʻati muxlislari, yoshlar va keng jamoatchilik faollari ishtirok etdi.   

Ko'rgazma joriy yilning 16 oktyabriga qadar namoyish qilinadi.