Foto: “Xalq soʻzi”

Unda viloyat hokimligi va Ichki ishlar vazirligi tezkor-qidiruv departamenti Kiberxavfsizlik markazi hamkorligida joylarda targʻibot-tashviqot tadbirlari tashkil etilib, sohaviy xizmat xodimlari, shuningdek, 40 dan ortiq korxona, muassasa va tashkilotlar hamda ommaviy axborot vositalari vakillari, blogerlar jalb etildi.

Haftalik davomida faol fuqarolar tomonidan 400 dan ziyod kiberxavfsizlik mavzusidagi axborotlar (videokontentlar) tayyorlanib, undan ijtimoiy tarmoqlarning 100 mingdan koʻproq foydalanuvchilari xabardor boʻlishdi. Bundan tashqari, kanal va guruhlar orqali kiberjinoyatlar, kibertahdidlar bilan bogʻliq 500 dan ortiq maʼlumotlar targʻib qilindi.

  — “Cyber-Week” haftaligi doirasida aholining turli qatlamlarini qamrab olgan yetti yoʻnalishdagi tanlov samarali tadbirlardan biri sifatida yodda qoladigan boʻldi, — deydi Namangan viloyati elektron hokimiyatni rivojlantirish markazi rahbari Baxtiyor Oxunboboyev. — Tadbirning har bir ishtirokchisi foydalanuvchilarga keng koʻlamli targʻibot materiallarini taqdim etishga harakat qildilar.

Misol uchun, taʼlim sohasidagi muassasalar oʻrtasidagi nominatsiyada gʻolib chiqqan Namangan shahridagi 14-umumtaʼlim maktabi oʻquvchisi Nosirjon Jamoliddinov ustozi Alisher Zayniddinov bilan birgalikda haftalik doirasida kibertahdid profilaktikasi bilan bogʻliq 1700 dan koʻproq materialni targʻib qilishga ulgurdi.

Davlatobod tumanidagi Madaniyat markazida haftalik natijalari tahlil qilinib, yakunda tanlovning 21 nafar gʻolibiga tashkilotchilarning tashakkurnoma hamda qimmatbaho sovgʻalari tantanali topshirildi.

Tadbirda soʻzga chiqqanlar kiberjinoyatchilikka qarshi kurashish va uning oldini olish kun tartibidagi doimiy masalalardan biriga aylanishi zarurligini taʼkidladilar.

Qudratilla NAJMIDDINOV, “Xalq soʻzi”.