Samarqand va Andijon viloyatlarida yer maydonlari olib berishni vaʼda qilgan firibgarlar ushlandi

Bosh prokuratura huzuridagi Departament hamda DXXning Samarqand viloyati boshqarmalari tomonidan tadbirkorlik subyektlarining huquqlarini himoya qilish yuzasidan oʻtkazilgan tezkor tadbirda “U.S.” MCHJ savdo kompleksi nazoratchisi Gʻ.M. tadbirkor A.E.ning ishonchiga kirib, unga ushbu savdo kompleksi hududidagi 60 kv metr boʻsh yer maydonini firibgarlik yoʻli bilan 40 000 AQSH dollariga sotishga kelishib, shundan 30 000 AQSH dollarini olgan vaqtida ashyoviy dalillar bilan ushlangan.

Shu kabi, Departament hamda DXXning Andijon viloyati boshqarmalari tomonidan oʻtkazilgan tezkor tadbirda fuqarolar M.A. va S.X. fuqaro I.D.ning ishonchiga kirib, unga Xoʻjaobod tumani hududidan 1 gektar yer maydonini goʻyoki yuqori lavozimda ishlovchi tanishlari orqali rasmiylashtirib berish evaziga 14 000 AQSH dollari va 91,6 mln soʻmni olgan vaqtlarida ashyoviy dalillar bilan ushlanganlar.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.