Foto: “Vatanparvar” tashkiloti Matbuot xizmati

Buxoro viloyatining Romitan tumanida “Vatanparvar” tashkiloti Oʻquv sport texnika klubining yangi zamonaviy binosi foydalanishga topshirildi. Bu haqda Oʻzbekiston Respublikasi mudofaasiga koʻmaklashuvchi “Vatanparvar” tashkiloti Matbuot xizmati xabar qildi.

Binoning tantanali ochilish marosimida Oʻzbekiston Respublikasi mudofaasiga koʻmaklashuvchi “Vatanparvar” tashkiloti Markaziy kengashi raisi Husan Botirov, tashkilotning Buxoro viloyati kengashi hamda uning tasarrufidagi tuman va shahar oʻquv muassasalari rahbarlari, Romitan tumani hokimi Umidjon Barnoyev, mahalla faollari va yoshlar ishtirok etdilar.

Husan Botirovning taʼkidlashicha, ushbu innovatsion texnologiyalar bilan jihozlangan yangi bino aholi, ayniqsa, yoshlar haydovchilik va bir qator texnik kasblarni egallashlari hamda sportning texnik va amaliy turlari bilan shugʻullanib, muvaffaqiyat qozonishlari uchun imkoniyatlar maskani boʻlib xizmat qiladi.

Shuningdek, soʻzga chiqqan Romitan tumani hokimi U.Barnoyev Oʻquv sport texnika klubini zamonaviy talablarga mos ravishda barpo etib, aholi foydalanishi uchun topshirgan “Vatanparvar” tashkiloti Markaziy kengashi rahbariyatiga chuqur minnatdorlik bildirib, ushbu ezgu ish tuman tarixida muhim voqea sifatida qolishini qayd etdi.

Tadbir ishtirokchilari yangi bino ichkarisiga taklif qilinib, ularga innovatsion texnologiyalar bilan jihozlangan, yiliga qariyb 1000 nafarga yaqin avtomototransport haydovchilarini tayyorlash quvvatiga ega sinfxonalar hamda yoshlar sportning texnik va amaliy turlari bilan shugʻullanishlari uchun moʻljallangan seksiyalarning xonalari koʻrsatildi.

Bundan tashqari, “Vatanparvar” tashkiloti Buxoro viloyati kengashi tasarrufidagi Qorakoʻl tumani Oʻquv sport texnika klubi negizida yangi qurib bitkazilgan avtodromning tantanali ochilish marosimi boʻlib oʻtdi.

Tadbirda soʻzga chiqqan tashkilot Markaziy kengashi raisi Husan Botirov va Qorakoʻl tumani hokimi Xurshid Tohirov ushbu zamonaviy avtodrom haydovchilik sirlarini puxta oʻzlashtirmoqchi boʻlgan minglab qorakoʻlliklar uchun asosiy amaliyot maskani boʻlib qolishini, negaki ushbu voqelik yoʻl harakati xavfsizligini taʼminlash sari yana bir muhim qadam boʻlib hisoblanishini bildirdilar.

Mazkur amaliy mashq maydonidan “A”, “B”, “BC” toifalari boʻyicha haydovchilarni tayyorlash va “C”, “BE”, “DE”, “CE” toifalari boʻyicha qayta tayyorlashda foydalanilishi koʻzda tutilgan.