Qadriyat, urf-odat, anʼana va yoshlar

“Mahalla” xayriya jamoat fondining Toshkent viloyati boʻlimi tomonidan joylarda xayriya tadbirlari oʻtkazish davom etmoqda. Jumladan, Yangiyoʻl shahri va tumanida 8-mart — Xalqaro xotin-qizlar kuni munosabati bilan 10 nafar nuroniy onaxonga bayram sovgʻalari ulashildi. Ularning ayrimlariga nogironlik aravachasi, uy-roʻzgʻor yumushida zurur boʻladigan maishiy texnika vositalari berildi.

— Uzoq yillardan buyon ogʻir xastalikka chalinganman, — deydi Yangiyoʻl tumani “Boʻston” MFYda yashovchi 1-guruh nogironi Gulbahor Janberova. — Bayram arafasida koʻngil soʻrab kelishganidan sevinchim ichimga sigʻmayapman. Biz kabi imkoniyati cheklanganlar shaxsga koʻrsatilayotgan muruvvat va doimiy eʼtibordan mamnunmiz.

Nurafshon shaharida Navroʻz umumxalq bayrami munosabati bilan “Qadriyat, urf-odat, anʼana va yoshlar” shiori ostida tadbirlar va xalq sayli boʻlib oʻtmoqda.

Xalqimizning azaliy qadriyatlarini oʻzida mujassam etgan bayramga bagʻishlangan barcha tadbirlarda mehr-muruvvat asosiy mezon qilib olingan. Nurafshondagi tadbirlarda kam taʼminlangan oilalar farzandlarining sunnat toʻylari oʻtkazib berildi. Yoshlar oʻrtasida sport musobaqalari oʻtkazilib, gʻoliblarga esdalik sovgʻalari topshirildi.

Shodiyor MUTAHAROV, “Xalq soʻzi”.