Rossiyaga qarshi to'qqizinchi sanktsiyalar paketi tayyorlanmoqda

image

Evropa Ittifoqi Ukrainadagi mojaro tufayli Rossiyaga qarshi to'qqizinchi sanktsiyalar paketi ustida faol ishlamoqda. Bu haqda bugun, 24 noyabr kuni Evrokomissiya (EK) rahbari Ursula fon der Lyayen Finlyandiyada bo'lib o'tgan matbuot anjumanida maʻlum qildi. 

"Bugun eʻlon qilishim mumkinki, biz sanktsiyalarning to'qqizinchi paketi ustida to'liq tezlikda ishlayapmiz", deydi u. 

Fon der Lyayenga ko'ra, EI Rossiya iqtisodiyotini zaiflashtirish uchun qattiq harakat qilmoqda va Ukraina g'alaba qozonmaguncha to'xtamaydi. 

Rossiya Ukrainaga nisbatan harbiyy bosqin boshlagan joriy yilning fevral oyidan beri Evropa Ittifoqi Rossiyaga qarshi sakkizta sanktsiya paketini joriy qilgan edi. Oxirgi sanktsiyalar paketi oktyabr oyi boshida tasdiqlangan.

Eslatib o'tamiz, kecha, 23 noyabr kuni Strasburgda Evropa Ittifoqi parlamenti Rossiya Federatsiyasining Ukrainaga qarshi harbiy tajovuzi tufayli Rossiyani terrorizmning homiysi sifatida tan olish to'g'risidagi rezolyutsiyani qabul qildi. Qarorni 494 nafar deputat qo'llab-quvvatladi, 58 nafari qarshi, 44 nafari betaraf qoldi.