Baku rossiyalik harbiylar joylashtirilgan zonadagi provokatsion voqealardan xavotirda

Ozarbayjonning Qorabog' mintaqasidagi rossiyalik harbiylar vaqtinchalik joylashtiriladigan zonaga harbiy texnika yetkazib berilmoqda. Bu haqda bugun, 24 noyabr kuni Bakuda bo'lib o'tgan "Vatan urushi tajribasi" mavzusidagi anjumanda Ozarbayjon Davlat xavfsizlik xizmati rahbarining birinchi o'rinbosari Jayhun Shadlinskiy maʻlum qildi. 

Uning so'zlariga ko'ra, ushbu zonada turli provokatsion tadbirlar tashkil etilishi ham tashvish uyg'otmoqda. 

Shadlinskiyning tushuntirishicha, Armanistondagi ayrim revanshist kuchlar Erevan va Baku o'rtasidagi muloqotga zarba berish urinishlaridan voz kechmayapti. 

Ozarbayjon Davlat xavfsizlik xizmati vakili Eronning Ozarbayjonga qarshi razvedka va qo'poruvchilik faoliyati mavzusiga to'xtaldi. 

U Baku bu yo'nalishda barcha zarur choralarni ko'rayotganiga ishontirdi.