Birinchi marta o‘tkazilayotgan Xalqaro zardo‘zlik va zargarlik festivali (fotoreportaj)

21—25-may kunlari Buxoro shahrida birinchi marotaba Xalqaro zardo‘zlik va zargarlik festivali o‘tkazilmoqda. Unda respublikaning barcha hududlaridan 288 nafar hunarmand ishtirok etmoqda. Festivalda xalq sayllari, dorboz va folklor jamoalari hamda turli konsert dasturlari tashkil etildi. Quyida “Daryo” muxbiri tomonidan tayyorlangan fotoreportajni taqdim etamiz.

Ushbu festival uchun Turizm va madaniy meros vazirligi tomonidan OAV vakillari uchun infotur uyushtirildi. Bundan tashqari, 58 davlatdan yuzlab xorijiy ishtirokchilar tashrif buyurgan bo‘lib, ularning orasidan zardo‘zlar, zargarlar, konferensiya ishtirokchilari, faxriy mehmonlar va xorijiy ommaviy axborot vositalari vakillari o‘rin olgan.

“Kelin bo‘lib tushganimda 18 yoshda edim. 20 yoshimdan boshlab qaynonamdan kashta tikishni o‘rgandim. Hozir uchinchi avlod hisoblanaman. Farzandlarimga ham 7 yoshidan boshlab o‘rgatyapman. Kashtado‘zlik mashaqqatli mehnat. Kichikroq yostiqlar uchun kashtani 1 kunda tiksak, 4 oylab, hatto bir yillab tikiladigan kashtalarimiz ham bor.

Agar turistlar ko‘p bo‘lib, savdo yaxshi bo‘lsa, bir oyda 10—20 million so‘m daromad ko‘ramiz. Lekin sof daromad emas, chunki kashtachilikning chiqimi ko‘p”, — deydi kashtado‘z Madina Qodirova.

Kashtachi ayolning aytishicha, ular Yaponiya, Amerika, Braziliya, Italiya, Ispaniya kabi Yevropa mamlakatlariga doimiy eksportni yo‘lga qo‘ygan.

Shuningdek, festivalda ishtirok etish uchun xorijiy mamlakat zargarlari tomonidan 15,5 kg kumush taqinchoq va 6 kg oltin buyum mahsulotlari olib kelingan.

Xalqaro zardo‘zlik va zargarlik festivali doirasida Bukhara Fashion days modalar oqshomi bo‘lib o‘tmoqda. Unda mahalliy va xorijiy dizaynerlar hamda hunarmandlar ishtirok etmoqda.