Namangan shahrida 24 mart kuni nomaʻlum shaxslar «Pekin» tibbiyot markazi binosiga bostirib kirib, muassasa shifokorlari va tarjimonini urib, pul mablag'larini o'g'irlab ketdi. Bu haqda Tergov departamenti axborot xizmati xabar berdi.

Maʻlum qilinishicha, soat 03:40 da nomaʻlum shaxslar Namangan shahar Qadamjoy mahallasida joylashgan «Pekin» tibbiyot markazi binosiga yuziga niqob taqib, binoning ikkinchi qavatidagi yotoqxonada uxlab yotgan, shu markazda shifokor bo'lib ishlovchi Xitoy fuqarolari V.Y va V.J. hamda ushbu markazda tarjimon bo'lib ishlovchi Y.U.ni urib, qo'l va oyog'ini skotch bilan bog'lagan.

Keyinchalik ular yotoqxonadagi tumbochka qulfini buzib, 10 000 dollar, 100 million so'm pul mablag'lari hamda ikki dona «Huawei» va «RedMi 8» telefonlarini bosqinchilik yo'li bilan qo'lga kiritib hodisa joyidan yashiringan.

Mazkur holat yuzasidan Namangan shahri bo'yicha Ichki ishlar organi faoliyatini muvofiqlashtirish boshqarmasi huzuridagi tergov bo'limi tomonidan Jinoyat kodeksining 164-moddasini 4-qismi «a» bandi (Bosqinchilik) bilan jinoyat ishi qo'zg'atilgan.

Olib borilgan tergov-tezkor qidiruv harakatlari davomida ushbu jinoyatni Farg'ona viloyatida yashovchi muqaddam sudlangan 31 yoshli J.K. boshchiligida 29 yoshli X.K., 24 yoshli I.A., A.Q. hamda Andijon viloyatida yashovchi 20 yoshli A.X. sodir etgani aniqlanib, protsessual tartibda ushlangan. Ularning yoni ko'zdan kechirilganda jami 10 million 620 ming so'm pul ashyoviy dalil tariqasida rasmiylashtirib olingan.

Tergov harakatlari jarayonida Andijon viloyatida yashovchi A.X. muqaddam mazkur markaz shifokorlari yaxshi daromad qilayotganidan xabar topib, binoning kalitini g'ayriqonuniy ravishda qo'lga kiritib, bu haqda tanishi J.K.ga aytib qiziqtirgani maʻlum bo'lgan. Hozirda tergov davom etmoqda.

Maʻlumot o'rnida, bu turdagi jinoyatlar uchun Jinoyat kodeksining normalariga ko'ra, 15 yildan 20 yilgacha ozodlikdan mahrum qilish jazosi tayinlanadi.