AQShda shu yilning yanvar oyida Kapitoliyda sodir etilgan tartibsizliklarni bostirishda qatnashgan Vashington politsiyasi ofitseri Gunter Xashida o‘z joniga qasd qildi. Bu haqda Vashington politsiya boshqarmasiga tayanib, CNN xabar berdi.

Xashida 29-iyul kuni o‘z uyida o‘lik holda topilgan. Bundan avvalroq 10-iyul kuni Vashington politsiyasining yana bir xodimi Kayl Defraytag vafot etgandi. Uning oilasi o‘limga o‘z joniga qasd qilish sabab bo‘lganini tasdiqlagan.

Kapitoliydagi tartibsizliklar guvohi bo‘lgan yana ikki politsiya ofitseri Jeffri Smit va Govard Libengud yanvarda o‘z joniga qasd qilgandi.

Kapitoliyga hujum haqidagi ish bo‘yicha 500 dan ortiq amerikalikka ayblov e’lon qilingan. Iyul oyining oxirida ushbu ish bo‘yicha birinchi marta qamoq jazosi tayinlandi — 38 yoshli Pol Xojkins sakkiz oylik qamoqqa hukm qilindi.

Kapitoliydagi tartibsizliklarni bostirishga Kapitoliy politsiya kuchlari va Vashington shahar politsiya departamentining kamida 850 xodimi jalb qilingan. Ularning 140 ga yaqini jarohatlangan. Iyul oyi oxirida bir nechta politsiya xodimi Kapitoliyga uyushtirilgan hujum bo‘yicha Kongressda guvohlik berdi.

Eslatib o‘tamiz, 6-yanvar kuni AQSh Kongressi a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda Trampning tarafdorlari Kongressga bostirib kirgan. Politsiya bir necha soat o‘tibgina namoyishchilarni Kapitoliydan haydab chiqarishga muvaffaq bo‘lgan. Huquq-tartibot organlari xodimlari o‘qotar qurol, dubinka, ko‘zdan yosh oqizuvchi gazdan foydalangan. Kapitoliyning xavfsizlik xodimi bilan birgalikda, besh kishi halok bo‘lgan. Tartibsizlikdan keyin federal qidiruv bo‘limi namoyish ishtirokchilariga qarshi 160 dan ortiq ish ochgan.

AQSh hukumatining xabar berishicha, Kapitoliyga qilingan hujum natijasida tarixiy ahamiyatga ega san’at asarlari va mebellar zarar ko‘rgan. Avvalroq Kapitoliyni ta’mirlash uchun 30 million dollar talab etilishi ma’lum bo‘lgandi.