Avstraliya hukumati bir qator mamlakatlar, xususan, Fransiya, Buyuk Britaniya hamda Kanada davlatlariga qoʻshilgan holda Rossiya va Ukrainaning tinchlik kelishuvidan soʻng Kiyevga tinchlikparvar kuchlarini yuborishni rejalashtirmoqda. Bu haqda 'Bloomberg' nashri maʼlum qildi.

Maʼlum qilinishicha, avvalroq, Avstraliya Bosh vaziri Entoni Albaneze hukumat boshqa mamlakatga qoʻshin joylashtirishi mumkinligi haqidagi xabarlarni inkor etgan. Keyinchalik, oʻz pozitsiyasini oʻzgartirgan hamda koʻp millatli tinchlikparvar kuchlar tarkibiga qoʻshilib Ukrainaga qoʻshin yuborish boʻyicha har qanday taklifni koʻrib chiqishlari mumkinligini bildirgan.

'Ayni paytda tinchlikparvar kuchlar boʻyicha muzokaralar olib borilmoqda. Avstraliya ham har qanday taklifni koʻrib chiqishga rozi. Chunki mamlakatimiz tarixan olib qaraganda tinchlikparvarlik faoliyatida ilgʻor boʻlgan', ' deydi mamlakat Bosh vaziri Sidneyda boʻlib oʻtgan tadbirdagi nutqida.

Maʼlumotlarga koʻra, Avstraliya hukumati hozirga qadar Ukrainaga 1,5 milliard dollar mablagʻ ajratgan boʻlib, shundan 1,3 milliard dollari toʻgʻridan toʻgʻri harbiy sohaga yordam sifatida yoʻnaltirilgan.

Shuningdek, Sidneydagi tadbirda AQSHning Ukrainaga harbiy yordamni butkul toʻxtatishi masalasi ham muhokamalar markazida boʻlgan.

'Ukraina xalqining oʻz suverenitetini himoya qilish uchun olib borayotgan jasoratli kurashi tahsinga loyiq. Men Vladimir Zelenskiyni qoʻllab-quvvatlayman. Ukrainaga yordam berish Avstraliyaning milliy manfaatlariga ham mos keladi. Biz Ukrainada tinchlik oʻrnatilishini istaymiz, ammo Rossiyaning noqonuniy va axloqsiz harakatlari mukofotlanmasligi kerak', ' deydi Entoni Albaneze.