Farhod ESONOV/'Xalq soʻzi'.'Taʼlim tizimidagi islohotlar samarasi mamlakat boʻylab boʻy koʻrsatmoqda. Buni Surxondaryo viloyatidagi umumtaʼlim maktablari faoliyatida ham koʻrish mumkin. Oʻqituvchilarning sifatli taʼlim berishi uchun barcha imkoniyat ishga solinmoqda. Elektron vositalardan tortib, yangi avlod darsliklarigacha olis va chekka hududlardagi maktablarga ham yetkazilgan. Yaratib berilayotgan bu kabi sharoitlar oʻqituvchilarning ham, oʻquvchilarning ham oʻrgatish va oʻrganish jarayonlarini sifat jihatdan yangi bosqichga olib chiqmoqda.

' Kasbim ortidan hurmat qozondim, elda aziz boʻldim, ' deydi Muzrabot tumanidagi 55-umumtaʼlim maktabining ona tili va adabiyot oʻqituvchisi Muborak Sultonova. ' Muallimlik hayotimning bir boʻlagiga aylangan, 25-yillik faoliyatim davomida, ayniqsa, bugungi kundagidek ragʻbatni koʻrmaganman. Davlatimiz rahbari tomonidan biz, oʻqituvchilarga yaratib berayotgan imkoniyat, shart-sharoitlar, koʻrsatayotgan alohida eʼtibor bois ishimizga boʻlgan mehrimiz, masʼuliyatimiz yanada ortmoqda. Bu yil oʻquvchilarimizning oliy oʻquv yurtlariga kirish koʻrsatkichi 80 foizni tashkil etdi. 20 foiz bitiruvchilarimiz oʻrta maxsus taʼlim muassasalarida oʻqishni davom ettirmoqda. Umuman olganda, bitiruvchilar yuz foiz taʼlimga qamrab olindi. Bu oʻz oʻzidan boʻlmayapti, albatta. Yaratilgan sharoit, oʻqituvchilarning oʻz kasbiga masʼuliyati ortidan erishilyapti. Men bugun respublikamizda 1 ming AQSH dollari miqdorida maosh olayotgan oʻqituvchilardan biri ekanimdan faxrlanaman.



2020-yilning noyabr oyida Prezidentimiz oʻqituvchilar va shifokorlar bilan boʻlib oʻtgan uchrashuvda ularning maoshlarini oshirish rejasini maʼlum qilgan edi. Oʻshanda nafaqat muallimlar, balki butun jamiyat ishonchi komilligidan xursand boʻldi. Chunki yaqin oʻtmishda nimalardir yuz berdiki, oʻqituvchi jamiyatning pastki qatlami vakillariga aylanib qoldi. Hurmati yoʻqolib, obroʻsi pasaydi, daromadi yetarli boʻlmadi. Ularga katta-kichik mansabdorlarning barchasi buyruq beradigan va hatto koʻcha tozalashgacha majbur qila oladigan boʻldi. Eng achinarlisi, paxta dalalarining eng old qatorida ham oʻqituvchilar edi. Bunday salbiy holatlarning barchasi birin-ketin bartaraf etildi.

Bugungi kunda oʻqituvchilarga mahorati va erishgan yutuqlariga qarab toʻlanadigan ustamalar soni 3 tadan 17 taga oshirilgani bois oʻqituvchilar uchun 1 ming AQSH dollari miqdorida maosh real hodisaga aylandi. Oʻz ustida astoydil ishlagan, xalqaro standartlar asosida malaka sertifikatini olgan oʻqituvchilar hatto undan ham koʻp maosh olmoqda.



Bunga bir misol, Muzrabot tumanidagi 7-umumtaʼlim maktabining oliy toifali rus tili oʻqituvchisi Mirsodiq Turopov bugun 2 ming AQSH dollari miqdorida maosh olayotgan mahoratli yosh muallimlardan. U til bilish darajasi boʻyicha xalqaro sertifikatga ega, vazir jamgʻarmasi ustamasi sohibi ham. Oʻz kasbidan qadr topgan muallim, oʻquvchilarning sevimli ustozi 13-yillik ish tajribasi davomida jamoasining ham mehrini qozongan.

' Oʻqituvchilarga yaratilayotgan imkoniyatlardan toʻlaligicha foydalanishga intildim, ' deydi Mirsodiq Turopov. ' Oʻz ustimda tinimsiz ishladim, izlandim. Bugun maqsadimga erishdim. Ayni paytda 2 ming AQSH dollari miqdorida oylik olyapman. Ishonmaydiganlar ham boʻlishi mumkin, ana shundaylarga bajonidil plastik kartam tarixini koʻrsataman. Oʻqituvchilarning bunday natijaga erishishi osonlik bilan boʻlmayapti, albatta. Bu Prezidentimizning odilona siyosati, millatparvarligi, oʻtgan yetti yil mobaynidagi tinimsiz saʼy-harakatining mahsulidir. Davlatimiz rahbarining taʼlim-tarbiya sohasi vakillari bilan muloqotida oʻtgan qisqa vaqtda bu borada erishilgan yutuqlar, zabt etilgan marralar yana bir karra aniq dalillar bilan asoslandi. Galdagi tashabbuslar esa, hech shubhasiz, Yangi Oʻzbekistonda taʼlimga, xususan, oʻqituvchi kasbiga juda katta eʼtibor va gʻamxoʻrlik koʻrsatilayotganning yorqin ifodasi boʻldi. Bu esa meni yanada shijoatlantirdi. Maqsadlarimni yanada yiriklashtirdi. Bu bilan toʻxtab qolmayman. Har yili mamlakat boʻylab oʻtkazilishi maqsad qilingan 'Yil oʻqituvchisi' tanlovida gʻolib chiqib, uch xonali uy sohibi boʻlishni niyat qildim.



Bugun Surxondaryoda shijoatli, bilim salohiyati yuqori, maqsadlari ulkan pedagoglar talaygina. Ular oʻz masʼuliyatlarini chuqur anglagan holda sharafli kasblaridan mamnun faoliyat yuritmoqda.