Sharof Rashidov tumani IIB 2-sonli IIB HPG profilaktika inspektori, mayor Vali Azizov 14 yillik xizmat tajribasiga ega. Bu yillarda u ko‘plab xodimlarga murabbiylik qildi. Ayni vaqtda «Jizzaxlik» mahallasining profilaktika inspektori, leytenant Doston Eshqulovga ham kasb sir-asrorlarini o‘rgatyapti.

Doston yaxshi eslaydi, mayorning ilk sabog‘i xizmatda hamisha xushmuomala bo‘lish kerakligi to‘g‘risida bo‘lgan. Shu bilan birga, suhbatdosh psixologiyasiga mos yondashish, xizmatga oid ma'lumotlarni sir tutish, ariza va murojaatlar bilan ishlashga doir tavsiyalarini bildirgan. 

Tabiiyki, mayor Vali Azizovning o‘zi ham bir kunda murabbiy darajasiga yetmagan. Chunonchi, 2010 yilda Jizzax davlat pedagogika institutini tamomlab, Mirzacho‘l tumani IIB huzuridagi qo‘riqlash xizmati tarkibida sohadagi faoliyatini boshladi. Oradan 4 yil o‘tgach, Forish tumanining 93,5 ming gektar maydonni egallagan «Qizilqum» mahallasi profilaktika inspektori lavozimiga tayinlangan lavhamiz qahramoni o‘shandan buyon huquqbuzarliklar profilaktikasi tizimida. 

Ta'kidlash joiz, u aynan «Qizilqum»da jinoyatchilikni jilovlashning hadisini oldi. Bino­barin, cho‘lda yo‘l topish, bir-­biridan olisda joylashgan aholi manzillarida jamoat xavfsizligini ta'minlash, tirikchiligining asosi chorvachilik bo‘lgan aholini qonunbuzarlardan himoyalash sirlarini o‘zlashtirdi. Jumladan, bir safar 148 bosh mayda shoxli molning o‘g‘irlanishi bilan bog‘liq jinoyatni fosh qilsa, boshqa safar 3 ta o‘g‘irlik qo‘y ortilgan «Lacetti»ni xizmat avtomashinasida quvib, to‘xtatishiga to‘g‘ri keldi.

Ayni vaqtda mayor Vali Azizov Sharof Rashidov tumanining 6 ming 341 kishi istiqomat qiladigan «Sovungarlik» mahallasida osoyishtalikka mas'ul. Bu jarayonda asosiy e'tibori ichki ishlar organlari hisobida turadigan 14 nafar, ma'muriy nazorat ostidagi 1 nafar, muqaddam sudlangan 19 nafar, jazoni ochiqda o‘tayotgan 11 nafar, ichkilikka ruju qo‘ygan 4 nafar shaxs hamda 3 ta nizoli oilaning a'zolariga qaratilgan. 

Joriy yilning o‘tgan davrida u 20 kishini ishga joylashtirdi. Shu kabi profilaktik tadbirlar mahallaning «yashil» maqomini mahkam tutishiga omil bo‘layotir. 

Alijon ABDUSATTOROV,

o‘z muxbirimiz.

Jizzax viloyati.