Andijon viloyatida noqonuniy yoʻllar bilan 1 616 802 000 soʻmlik dori vositalari olib kelgan shaxslarga hukm oʻqildi. Bu haqda Davlat xavfsizlik xizmati xabar berdi.

Qayd etilishicha, Andijon viloyatining Qorasuv shahrida yashovchi, 1983-yilda tugʻilgan, muqaddam sudlangan fuqaro A.D. sinfdoshi Sh.J. bilan oʻzaro til biriktirib, 2023-yilning avgust oyida Qirgʻiziston Respublikasida istiqomat qiluvchi shaxslar tomonidan Oʻzbekiston Respublikasi hududiga davlat chegarasi orqali noqonuniy oʻtkazilgan 87 turdagi 'Fokusin', 'Dopegit', 'Kogitum', 'Erinit' va boshqa dori vositalarini qabul qilib olgan vaqtida Davlat xavfsizlik xizmati hamda bojxona organlari xodimlari tomonidan ashyoviy dalillar bilan ushlangan.

Baholash faoliyati bilan shugʻullanuvchi MCHJ xulosasiga koʻra, dori vositalarining umumiy qiymati 1 mlrd 616 mln 802 ming soʻmni tashkil qilgan.

Shuningdek, Sogʻliqni saqlash vazirligining 'Farmatsevtika mahsulotlari xavfsizligi markazi' DM ekspertiza tekshiruvi xulosasiga koʻra, ushbu dori vositalarining maʼlum bir qismi tibbiy buyumlar va tibbiy texnikalar davlat roʻyxatidan oʻtmagan, davlat reyestriga kiritilmagan hamda ularga nisbatan muvofiqlik sertifikatlari rasmiylashtirilmagan.

Taʼkidlash lozimki, fuqaro A.D. muqaddam uyushgan guruh tarkibida valyuta qimmatliklarini qonunga xilof ravishda oʻtkazish va bojxona toʻgʻrisidagi qonun hujjatlarini buzish jinoyatlarini sodir etganligi uchun jinoiy javobgarlikka tortilgan.

Holat yuzasidan A.D. va Sh.J.ga nisbatan DXX Andijon viloyati boʻyicha boshqarmasi Tergov boʻlimi tomonidan 'Bojxona toʻgʻrisida'gi qonun hujjatlarini buzishda ayblanib, Jinoyat kodeksining 182-moddasi 2-qismi 'a' bandi bilan jinoyat ishi qoʻzgʻatilib, tergov harakatlari olib borildi.

Jinoyat ishlari boʻyicha Qoʻrgʻontepa tuman sudi tomonidan fuqaro A.D.ga nisbatan 5-yil hamda fuqaro Sh.J.ga nisbatan 3-yil muddatga ozodlikdan mahrum qilish jazosi tayinlandi.