Toshkentda yashovchi S.M. jarqo‘rg‘onlik tadbirkor K.X.dan qiymati 400 million so‘mlik mahsulot xarid qiladi. Kelishuv boshida mahsulotlar uchun 100 million so‘m pulni shu yerning o‘zida beradi, qolgan 300 mil­lion so‘mini biroz muddatdan keyin berishini aytadi. Tadbirkor bunga rozi bo‘ladi. Ammo S.M. mahsulotlarni olib ketgach, qolgan pulni bermaslik uchun ming bir bahonalarni to‘qiy boshlaydi. Oradan ancha vaqt o‘tgach, K.X. ichki ishlar organiga murojaat qiladi. 

Tergov ishini olib borgan Temurmalik Bo‘riyev ustalik bilan dalil to‘plashga kirishadi. Chunki oluvdor qilmishidan bo‘yin tovlashga tushadi. Telefondagi so‘zlashuvlar, kelishuv vaqtidagi guvohlarning ko‘rsatmalari, zarur hujjatlarni to‘plagach, fuqaro S.M. noiloj qilmishini tan oladi va jabrlanuvchiga pullarni to‘lab beradi. 

Katta leytenant T.Bo‘riyev tomonidan fosh etilgan shu kabi firibgarlik, o‘g‘irlik, shaxsga tan jarohati yetkazish kabi jinoiy ishlarga qo‘l urgan kimsalar qonun oldida javob berishdi. Ayniqsa, shu yilning yanvar oyida sodir bo‘lgan o‘g‘irlik ortidan 7 ta o‘g‘rilik holatiga aniqlik kiritilib, jinoyatchilar qonun ixtiyoriga topshirildi. 

– IIV Akademiyasini tamomlagach, faoliyatimni Qiziriq tumani IIB huzuridagi Tergov guruhida surishtiruvchilikdan boshladim, – deydi lavhamiz qahramoni. – Bugunga qadar ish faoliyatim davomida turli holatlarga duch keldim, turli jinoiy ishlarning tergov jarayonlarida qatnashdim. Ba’zan ishning mashaqqatli jihatlariga sabr qilishga to‘g‘ri keldi. Ammo, muhimi harakatdan to‘xtamaslik, o‘z ustida ishlash va doimiy izlanish lozimligini tushunib yetdim. 

Temurmalik Bo‘riyev oilali, bir nafar farzandi bor. Turmush o‘rtog‘i Muqaddas Norqulova tibbiyot yo‘nalishida tahsil olmoqda. U ham turmush o‘rtog‘ining mas’uliyatli vazifada ishlashini yaxshi tushun­gan holda, doim qo‘llab-quvvatlaydi. Chunki oilasida halovat topmagan kishi ishida ko‘ngli to‘lib mehnat qilolmaydi. 

Katta leytenant T.Bo‘riyev jamoat tadbirlarida ham faol. «Eng yaxshi tergovchi» ko‘rik-tanlovida, «Zakovat» intellektual o‘yinlarida yosh bilimdon xodim sifatida qatnashib kelmoqda. Kelgusida esa o‘z sohasining yetuk mutaxassisi bo‘lib, ilmiy faoliyat bilan shug‘ullanish niyati bor. 

Feruza RAHMONQULOVA,

o‘z muxbirimiz.

Surxondaryo viloyati.