Nukus shahridagi test sinovlari Respublika oʻyin turlari va yengil atletika boʻyicha ixtisoslashtirilgan bolalar va oʻsmirlar sport maktabi, Berdaq nomidagi Qoraqalpoq davlat universiteti sport saroyi kabi 5 ta obyektda boʻlib oʻtmoqda.



Qoraqalpogʻiston Respublikasi Joʻqorgʻi Kengesi qoʻmita raisi Tajibay Romanov, Qoraqalpogʻiston Respublikasi Oliy taʼlim, fan va innovatsiyalar vaziri Batirbek Qayipbergenov, Oʻzbekiston Respublikasi Oliy taʼlim, fan va innovatsiyalar vazirligi huzuridagi Talaba va oʻquvchilarning ijtimoiy faolligini oshirish markazi rahbari, shuningdek, Nukus davlat pedagogika instituti rektori abituriyentlarning ota-onalari bilan suhbatlashib, ularning farzandlariga test sinovlarida omad tiladi.



' Bugun qizim yuridik taʼlim yoʻnalishiga test topshirmoqda. Test sinovlariga yaxshi tayyorgarlik koʻrdi. Bu yerda ota-onalarning test jarayonini onlayn kuzatib borishi uchun barcha sharoitlar yaratilgan, ' deydi nukuslik Sarsengul Bekjanova.



Test sinovlari toʻliq videokuzatuv orqali onlayn translyatsiya qilinmoqda. Jarayonni test2024.uz sayti orqali onlayn kuzatib borish imkoniyati yaratilgan.



Maʼlumot uchun: Qoraqalpogʻiston Respublikasida oliy va professional taʼlim muassasalariga oʻqishga kirish test sinovlari shu yilning 25-iyul kunigacha davom etadi. Test sinovlari kuniga ikki smenada ' 1-smena 08:00 dan 11:00 gacha, 2-smena esa 15:00 dan 18:00 gacha boʻlib oʻtadi.