Sakkiz nafar respublikachi kongressmen AQSHning amaldagi prezidenti Jo Bayden oʻzidan oldingi prezident Donald Trampga suiqasd uyushtirilishida aybdor ekanini aytdi.

'Bayden kampaniyasining diqqat markazi shundaki, Donald Tramp avtoritar fashist, uni har qanday holatda ham toʻxtatish kerak. Bu ritorika bevosita Trampga suiqasd uyushtirishga olib keldi', deb yozdi Ogayo shtatidan respublikachi senator Jeyms Devid Vens oʻzining 'X' ijtimoiy tarmogʻidagi sahifasida.

Vakillar palatasi aʼzosi va Tramp tarafdori Uesli Xantning 'X' ijtimoiy tarmogʻida yozishicha, Baydenning ritorikasi siyosiy zoʻravonlikka olib kelgan.

Pensilvaniya shtatining Butler okrugining prokurori, kongressmen Mayk Kollinz Baydenga qarshi qotillikka undash ayblovlari qoʻyishi kerakligini taʼkidlamoqda.

Respublikachi Keyt Self esa har bir amerikalik amaldagi prezidentning Trampga qarshi zoʻravonlik qilinishiga undaganidan gʻazablanishi kerakligini aytdi.

Kongressmenlar Loren Boebert, Marsha Blekbern, Nik Lalota va Klaudiya Tenni ham ushbu suiqasdda Baydenni ayblamoqda.

Avval xabar berganimizdek, bugun AQSHning sobiq prezidenti Donald Trampga suiqasd uyushtirildi.

Hodisa u Pensilvaniyada oʻz tarafdorlari bilan uchrashuv vaqtida yuz berdi. Tramp qulogʻidan yaralandi va xavfsizlik xizmati xodimlari qurshovida voqea joyini tark etdi.

Maxfiy xizmat oʻq uzgan odamni oʻldirgan. Hodisa oqibatida saylovoldi miting ishtirokchilaridan biri halok boʻlgan, yana ikki nafari ogʻir yaralangan.

AQSH prezidenti Jo Bayden Trampning tuzalib ketishi uchun ibodat qilayotganini aytdi. Keyinroq, Bayden Tramp bilan telefon orqali gaplashgani haqida xabarlar tarqaldi.

Federal qidiruv byurosi ushbu hodisa boʻyicha tergovda asosiy vazifani oʻz zimmasiga olgan.

Aniqlanishicha, Trampni oʻldirmoqchi boʻlgan shaxs Pensilvaniya shtatida yashagan 20 yoshli Tomas Metyu Kruks boʻlib chiqqan.

Vakillar palatasining Nazorat va javobgarlik qoʻmitasi Donald Trampga suiqasd boʻyicha tergov boshlagan.