O‘zbekiston Respublikasi Vazirlar Mahkamasining tegishli qarori bilan, Viktor Veniaminovich Nam Toshkent shahridagi Puchon universiteti rektori lavozimidan ozod qilindi va uning o‘rniga Agrippina Vasilevna Shin tayinlandi. Bu haqda Bosh vazir matbuot kotibi Bekzod Hidoyatov ma’lum qildi.

U  2022 yil 30 dekabrdan buyon Maktabgacha va maktab ta’limi vazirining birinchi o‘rinbosari lavozimida, 2023 yil 23 martdan Maktabgacha ta’lim agentligi direktori lavozimida ishlab kelayotgan edi.

Prezidentning 2024 yil 2 iyul kuni imzolangan “Maktabgacha va maktab ta’limi sohasida davlat boshqaruvi tizimini takomillashtirish chora-tadbirlari to‘g‘risida”gi farmoni bilan Maktabgacha ta’lim agentligi faoliyati tugatilib, Maktabgacha va maktab ta’limi vazirligi tasarrufiga o‘tkazilgandi.  

Qayd etilishicha, Puchon universiteti rektori lavozimidan ozod qilingan Viktor Veniaminovich Nam Toshkent shahridagi “A.I.Gersen nomidagi Rossiya davlat pedagogika universiteti” federal davlat byudjeti oliy ta’lim muassasasi filialining ijrochi direktori lavozimiga tayinlangan. Shu lavozimda ishlab kelayotgan Qahramon Tanzilovich Olimov esa lavozimidan ozod qilindi.

Shuningdek, Eldor Sodiqovich Yo‘ldoshev Toshkent shahridagi “S.A.Gerasimov nomidagi Butunrossiya davlat kinematografiya instituti” federal davlat byudjeti oliy ta’lim muassasasi filialining direktori lavozimidan ozod qilindi. Uning o‘rniga Iqbol Mamasodiqovich Meliqo‘ziyev tayinlandi.

Bundan tashqari, Eldor O‘ralovich Shermanov Yunus Rajabiy nomidagi O‘zbek milliy musiqa san’ati institutining o‘quv ishlari bo‘yicha prorektori – rektor vazifasini vaqtincha bajaruvchi etib 6 oy sinov muddati bilan tayinlandi.