Yevropa Komissiyasi Ukrainaga yordam jamg‘armasi doirasida taftish komissiyasini tuzdi. Bu haqdagi tegishli qaror kecha, 17 iyun kuni Yevropa Ittifoqining rasmiy jurnalida chop etildi.

Mazkur organ Ukraina rasmiylariga Kiyevga ko‘rsatilgan yordamdan foydalanishni nazorat qilish, shuningdek, firibgarlik, korrupsiya va manfaatlar to‘qnashuvining oldini olishda yordam berishi uchun mo‘ljallangan. U uch a’zodan iborat bo‘lgan holda Bryusseldan turib faoliyat olib boradi.

Hujjatda aytilishicha, Ukrainadagi korrupsiyaga qarshi kurashuvchi yangi organ Yevrokomissiyaga doimiy hisobot berib turadi. Ushbu antikorrutsion tashkilot 2028 yil 30 iyungacha bo‘lgan muddat davomida uch a’zodan iborat bo‘lishi belgilangan. U Bryusseldan turib ishlashiga qaramay, alohida kotibiyati Kiyevda joylashishi nazarda tutilgan.

Yevropa Komissiyasining qaroriga ko‘ra, taftish komissiyasining kamida oltita yig‘ilishi har yili Bryusselda o‘tkazilishi lozim. Ba’zi hollarda ular boshqa joylarda yoki onlayn formatda o‘tkazilishi ham mumkin. Shuningdek, auditorlar yiliga olti marta agar sharoit imkon bersa, Kiyevga tashrif buyurishlari kerakligi qayd etilgan.

2023 yilning iyun oyida Kiyevga uch yil davomida 50 milliard yevro ajratish rejasi munosabati bilan Bryussel Ukrainani mablag‘ bilan ta’minlash uchun qo‘shimcha shartlarni e’lon qilgan edi. Shartlar uchta asosiy punktdan iborat.

Birinchidan, Ukraina yordam samaradorligini oshirish uchun audit va nazorat tizimini modernizatsiya qilishi kerak edi. Ikkinchidan, Yevrokomissiya rejani amalga oshirish jarayonida istalgan vaqtda tekshiruv o‘tkazish imkoniyatiga ega bo‘lishi belgilangandi. Uchinchi talabga ko‘ra esa, mumkin bo‘lgan qonunbuzarliklar, firibgarlik va korrupsiyaning oldini olish uchun mustaqil auditorlik kengashi tashkil etilishi e’lon qilindi. U davlat mablag‘larini har qanday aniqlangan yoki shubhali tarzda noto‘g‘ri boshqarilgan holatlar, shuningdek, qonun hujjatlarida belgilangan kamchiliklar to‘g‘risida Yevropa Komissiyasiga hisobot berishi shart ekanligi uqtirilgan.