1946-yil Toshkent viloyatining Chirchiq shahrida tug‘ilgan Shavkat Mamadaliyev harbiy xizmatdan keyin o‘rta maktabda o‘qituvchilik qilgan.Toshkent davlat universiteti yuridik fakul'tetining sirtqi bo‘limida tahsil olish bilan birga, Chirchiq shahrida turli lavozimlarda ishladi.1974-yil yo‘llanma bilan Sirdaryo viloyati IIB tasarrufiga yuborilgan Sh. Mamadaliyev Sirdaryo tumani IIB bosh­lig‘ining shaxsiy tarkib bilan ishlash bo‘yicha o‘rinbosari vazifasida xizmatni boshladi. Yosh xodimga general-mayor Otamurod Muhammadiyev, polkovnik Serikboy Jumatayev kabi ustozlar yo‘l-yo‘riq ko‘rsatishdi. 1974–1976-yillarda tuman IIB boshlig‘ining birinchi o‘rinbosari, 1977–1979-yillarda Mehnatobod tumani IIB boshlig‘i lavozimlarida faoliyat ko‘rsatgan Sh. Mamadaliyev ushbu tumanlarda jinoyatchilikka qarshi kurashish borasida sezilarli natijalarga erishdi.Saksoninchi yillarning boshida qariyb ikki yil davomida Moskvada ta'lim olib qaytgan Shavkat Mamadalievni Sirdaryo viloyati IIB shtab boshlig‘ining o‘rinbosari etib tayinlashadi. Shtabning ishi barcha jarayonlarni muvofiqlashtirish, hujjatlarni to‘g‘ri yuritish kabi vazifalarni o‘z ichiga olardi. Allaqachon muayyan tajribaga ega mayor Sh. Mamadaliyev uchun bu ishlar aslo qiyinchilik tug‘dirmadi. 1989-yilda esa Boyovut tumani IIB boshlig‘i lavozimiga tayinlandi. 1994–1997-yillar davomida Sirdaryo viloyati IIB M va FRB boshlig‘i vazifasida sidqidildan xizmat qilib, tizimdagi 33 yillik faoliyatidan so‘ng hurmat va ehtirom bilan pensiyaga chiqdi. Polkovnik Shavkat Mamadaliyevning o‘nlab shogirdlari bor. Ular orasida polkovnik Tohir Musayev, Sirdaryo tumani IIB JQB katta tezkor vakili lavozimida ishlagan kapitan Erkin Abdurahmonov, Sirdaryo viloyati IIB boshlig‘ining sobiq o‘rinbosari, polkovnik Baxtiyor Jumatayevlarning nomini alohida tilga oladi. Shavkat ota to‘rt nafar farzandni tarbiyalab, uyli-joyli qildi. O‘g‘li Otabek Shavkatov ota izidan ketdi. Uzoq yillar ichki ishlar tizimida faoliyat ko‘rsatib, mayor unvonida pensiyaga chiqdi. 78 yoshni qarshilagan Shavkat ota o‘z umrini osoyishtalik, jamoat tartibini saqlash, jinoyatchilikka qarshi kurashga sarflaganidan faxrlanadi.

Abdurahmon MUSTAFOQULOV,

o‘z muxbirimiz.

Sirdaryo viloyati.