AQSH Ukrainaga 400 million dollarlik yangi harbiy yordam paketini e’lon qildi. Bu haqda AQSH Mudofaa vazirligi ma’lum qildi.

Yangi yordam paketi 300 kilometrgacha uchadigan raketalarni o‘z ichiga oladi, bu qurolning oktyabr oyida yetkazib berilgan versiyasidan ikki baravar ko‘p. Shuningdek, ushbu qurollar beriladi:

• Patriot havo mudofaasi tizimlari va yer-havo raketa tizimlari uchun qo‘shimcha havo mudofaasi o‘q-dorilari
• Stinger zenit raketalari
• Raketalar va radarlarni Ukraina tizimlari bilan birlashtirish uchun uskunalar
• 155 va 105 mm artilleriya snaryadlari
• Javelin va AT-4 tankka qarshi tizimlari
• Samolyot o‘q-dorilari
• yuqori tezlikdagi radiatsiyaga qarshi raketalar (HARM)
• Bradley piyoda askarlarining jangovar mashinalari
• M113 zirhli transport vositalari
• HMMWV va MRAP sinfidagi harbiy mashinalar
• qirg‘oq va daryo patrul katerlari
• granatalar va o‘q-dorilar
• kimyoviy, biologik, radiologik va yadroviy himoya vositalari

“Bular jasur Ukraina xalqini Rossiya tajovuzidan himoya qilishda yordam berishi kerak. Qo‘shma Shtatlar va xalqaro koalitsiya Ukraina erkinligini himoya qilishda davom etadi”, deydi AQSH Davlat kotibi Entoni Blinken o‘z bayonotida.

Bu AQSH Prezidenti Bayden Ukrainaga 61 milliard dollarlik harbiy yordam ko‘rsatishni nazarda tutuvchi qonunni imzolagan 24 apreldan buyon Ukrainaga ko‘rsatilgan uchinchi yordamdir.

Eslatib o‘tamiz, avvalroq birinchi F-16 qiruvchi samolyotlari Ukrainaga iyun yoki iyul oylarida yetkazilishi aytilgandi.

Bundan tashqari, Fransiya Ukrainaga muddati o‘tgan uzoq masofali Scalp raketalarini, Germaniya esa 3 ta HIMARS raketa uchirgichlarini yetkazib berishi ma’lum qilingandi.