Asli Xatirchi tumanida tug‘ilib voyaga yetgan Azim Shodiyev o‘quvchilik davridayoq huquqiy mavzuda maqolalar yoza boshladi. Keyinroq bilimlarini Navoiy davlat peda­gogika instituti tarix-huquq yo‘nalishida o‘qib, yanada boyitdi. U mana to‘rt yildirki, Karmana tumani «Varq» mahallasida profilaktika inspektori lavozimida xizmat qilmoqda.

Mazkur mahallada o‘zbek, tojik, rus va tatar millat vakillari ahil-inoq yashashadi. Hududning osoyishtaligiga mas’ul katta leytenant Azim Shodiyev kunning qaysi vaqtida bo‘lmasin, mahalla ahlining muammolarini hal etishdan, og‘irini yengil qilishdan erinmaydi.

– Oila mustahkam, tinch bo‘lsa, jamiyat ham osoyishta, farovon bo‘ladi. Shu bois oilalar tinchligiga alohida e’tibor qaratamiz. Avvalo nizo chiqqan oilaning turmush sharoitini, ijtimoiy ahvolini o‘rganamiz, ishsiz oila a’zolari bandligini ta’minlaymiz, – deydi katta leytenant Azim Shodiyev.

Mahallaning Birdamlik ko‘chasida joylashgan 187-uyning peshtoqida Vatanimizning Davlat bayrog‘i hilpirab turadi. Boisi, bu xonadonda lavhamiz qahramoni istiqomat qiladi.

– Azimjon erta-yu kech mahallamiz ahlining tashvishi bilan yashaydi. U farzandlarimiz, nabiralarimizni to‘g‘ri yo‘lga boshlash borasida jon kuydiradi. Inspektorimizning xizmatidan ko‘nglimiz to‘q. Har doim uning haqiga duo­damiz, – deydi mahallaning piri badavlat nuroniylaridan Axtam bobo Sultonov.

– O‘tgan yili birgalikdagi sa’y-harakatlarimiz natijasida huquqbuzarliklar nisbatan kamaydi. Hududda jinoiy holatlarni keskin kamaytirish uchun uning tub ildizi, sabablarini mahalla ahli bilan birga tahlil etyapmiz, – deydi katta leytenant A. Shodiyev.

Mahliyo XOLOVA,

o‘z muxbirimiz.

Navoiy viloyati.