Katta serjant Baxtiyorjon Musulmanovda harbiy xizmatchi bo‘lish orzusi bolalikdan yo‘ldosh. Amakisi Shavkat Xoliqovning chorak asr harbiy xizmatchi bo‘lgani va uyga formada keli­shi uning orzusiga sabab bo‘ldi. Baxtiyorjon G‘uzor tumanidagi o‘rta maktabni bitirib, yigitlik burchini IIV Qorovul qo‘shinlariga qarashli poytaxtimizda joylashgan 7534-harbiy qismda o‘tadi. 

Uning o‘z ishiga bo‘lgan mas’uliyati va qiziqishini sezgan harbiy qism rahbariyati muddatli harbiy xizmatni tugatgan Baxtiyorjonga shartnoma asosida xizmatni davom ettirishni taklif qildi. Shu tariqa, mazkur harbiy qism 2-batalyonida shartnoma asosida vzvod nazoratchisi lavozimida faoliyatini boshladi.  

O‘tgan davr mobaynida tinimsiz izlanib, sohaga oid bilim va ko‘nikmasini oshir­di. Ustozi, katta serjant Qahramon Xidirovdan kasb sir-asrorlarini o‘rgandi. Qarshi shahridagi 7533-harbiy qism 3-batalyon nazoratchisi lavozimida xizmatni davom ettirgan B. Mu­sulmanov Toshkent avtomobil yo‘llari texnikumida sirtdan tahsil olishga ham ulgurdi. 

IIV Qorovul qo‘shinlariga qarashli Buxoro viloyatidagi 7536-harbiy qism saf bo‘linmasi boshlig‘i, leytenant Umrzoq Eshon­qulov hamda 7533-harbiy qism mas’ul ijrochisi, kichik serjant Pahlavon Sayfullayevlar uni ustoz sifatida qadr­la­shadi. Mana chorak asrdirki, yurtga va kasbiga sadoqat bilan xizmat qilib kelayotgan Baxtiyorjon turmush o‘rtog‘i Rayhonaxon bilan o‘g‘li Quvonchbek tarbiyasida ham sobitqadam. 

 – Ustoz sifatida yoshlarning bilim va malakasini oshirishga munosib hissa qo‘shmoqda, – deydi ushbu harbiy qism komandirining birinchi o‘rinbosari – shtab boshlig‘i, mayor Boburjon Ismoilov. – Bundan tashqari, barcha tadbirlarda faol ishtirok etish bilan birga, boshqalarni ham bunga jalb etadi. 

O‘z vazifasini yaxshi bilishi, tirishqoqligi, hamkasblariga doimo ko‘maklashishi bilan jamoada obro‘ topgan.

Sardorbek TURSUNPO‘LATOV, 

kichik serjant.

Qashqadaryo viloyati.