Ijtimoiy tarmoqlarda Samarqand viloyatining Paxtachi tumanidagi bozorga rais etib tayinlangan shaxsning qamalganidan so‘ng onasi norozi bo‘lib qilgan videomurojaati tarqaldi. Holatga viloyat prokuraturasi munosabat bildirdi.

Aniqlanishicha, bozor raisi G.A. va V.N.lar ishchi xodimlarining 113 mln so‘mdan ortiq maoshlarini ularga to‘lab bermasdan, shtatlar jadvalida mavjud bo‘lmagan 8 nafar xodimlarga 13 mln 781 ming so‘m ish haqi tashlab berib, tasdiqlangan shtatlar jadvaliga nisbatan xodimlarga 24 mln 594 ming so‘mlik oylik ish haqlarini ortiqcha hisoblab, ushbu pul mablag‘larini talon-toroj qilishgan.

Bundan tashqari, tergovda viloyat bozorlar va savdo komplekslari uyushmasi tomonidan berilgan 68 mln 250 ming so‘mlik mahsulotlarni talon-toroj qilishgani aniqlangan. Mazkur holat yuzasidan “Paxtachi dehqon bozori” MCHJ rahbari G.A. va jamiyatning bosh hisobchisi V.N.larga nisbatan Jinoyat kodeksining 167-moddasi bilan jinoyat ishi qo‘zg‘atilib, 2 nafar gumonlanuvchiga nisbatan sudning ajrimi bilan “qamoqqa olish” tarzidagi ehtiyot chorasi qo‘llanilgan.

Ushbu jinoyat ishi bo‘yicha Paxtachi tumani prokuraturasi tomonidan dastlabki tergov harakatlari o‘tkazilib, jinoyat ishi mazmunan ko‘rib chiqish uchun jinoyat ishlari bo‘yicha Paxtachi tuman sudiga yuborilgan.Hozirda jinoyat ishi bo‘yicha sud muhokamasi olib borilmoqda.