Taʼkidlash joiz, Oʻzbekiston va Buyuk Britaniya oʻrtasidagi aloqalarda yuqori darajadagi siyosiy va diplomatik, oʻzaro manfaatli hamkorlik va madaniy-gumanitar almashinuv uchun salmoqli salohiyat mavjud.

Shu nuqtai nazardan tashrifning birinchi kuni Senat Raisi qator ikki tomonlama uchrashuvlar oʻtkazdi.

Britaniyaning xotin-qizlar ishlari boʻyicha vaziri Mariya Kolfild bilan boʻlib oʻtgan muloqotda gender tenglikni taʼminlash va xotin-qizlarning huquq hamda imkoniyatlarini kengaytirish borasida ikki mamlakat oʻrtasida hamkorlikni yoʻlga qoʻyish masalalari muhokama qilindi.

Xususan, xotin-qizlarning huquq va manfaatlarini himoya qilish, ularni har tomonlama qoʻllab-quvvatlash, oiladagi zoʻravonlikka qarshi kurashish, iqlim oʻzgarishining ayollar va qizlarning hayoti sifatiga taʼsirini kamaytirish yoʻnalishlariga eʼtibor qaratildi.

Ayollar tadbirkorligini qoʻllab-quvvatlash, yangi ish oʻrinlari yaratish, xotin-qizlarning turmush va mehnat sharoitlarini yaxshilash hamda 'STEM' dasturi orqali qizlar uchun sifatli, arzon taʼlim berish borasida oʻzaro tajriba almashish yuzasidan qoʻshma loyihalarni amalga oshirish boʻyicha fikr almashildi.

М.Колфилд Yangi Oʻzbekistonning xotin-qizlarning mamlakat hayotidagi siyosiy, iqtisodiy va ijtimoiy faolligini ragʻbatlantirish borasidagi saʼy-harakatlari strategik ahamiyatga ega ekanini taʼkidladi. U soʻnggi yillarda ayollarni kamsitishning barcha shakllariga barham berish va gender tenglikni taʼminlash borasida erishilgan natijalarni yuqori baholadi.

Uchrashuv yakunida ikki mamlakat tegishli vazirlik va idoralari oʻrtasida oʻzaro manfaatli hamkorlikni faollashtirishga kelishib olindi.