Rossiya Mudofaa vazirligi bortida Il-76 samolyotining Belgorodda qulashida Ukrainani aybladi. Bu haqda bugun, 24 yanvar kuni vazirlikning Axborot va ommaviy kommunikatsiyalar boshqarmasi boshlig‘i, general-leytenant Igor Konashenkov bayonot berdi.
Uning aytishicha, Ukraina kuchlari soat 11:15 da Chkalovskiy-Belgorod aerodromi yo‘nalishi bo‘yicha Ukraina harbiylarini almashish uchun olib ketayotgan Rossiya harbiy-transport samolyotini urib tushirgan.
“Samolyot Ukraina qurolli kuchlari tomonidan Xarkov viloyatining Lipsiy tumanidan zenit-raketa tizimi yordamida yo‘q qilingan. Rossiya Aerokosmik kuchlarining radar uskunalari ikkita Ukraina raketasi uchirilganini kuzatdi”, deydi Konashenkov.
Qayd etilishicha, samolyot bortida olti nafar ekipaj a’zosi, 65 nafar ukrainalik harbiy xizmatchi va ularga hamrohlik qilayotgan uch nafar rossiyalik harbiy xizmatchi bo‘lgan. Samolyot ekipaji va barcha yo‘lovchilari halok bo‘lgan.
“Ukraina rahbariyati bugungi kunda Ukraina harbiy xizmatchilari almashish uchun Belgorod aerodromiga harbiy-transport samolyotlarida olib ketilishini juda yaxshi bilardi. Oldin erishilgan kelishuvga ko‘ra, bu voqea kunning ikkinchi yarmida Rossiya-Ukraina chegarasidagi Kolotilovka o‘tkazish punktida bo‘lib o‘tishi kerak edi”, deydi Rossiya Mudofa vazirligi voizi.
Konashenkov Ukrainani Rossiyaga ayb tirkash maqsadida o‘z harbiylarini yo‘q qilishda aybladi.
Biroq rasmiy Kiyev hozircha bu ayblovlarga javob bermadi.