Mohlaroyim eng birinchi medalini olgan kunni hech yodidan chiqarmaydi. 2011-yilda karate bo‘yicha o‘smirlar o‘rtasida o‘tkazilgan O‘zbekiston chempionatida o‘z vazn toifasida bronza medalni qo‘lga kiritgandi. So‘ngra Malayziyada Osiyo chempionatida g‘olib bo‘ldi, Minskda o‘tkazilgan MDH mamlakatlari sport o‘yinlarida ikkinchi o‘rinni egalladi, Toshkentda bo‘lib o‘tgan jahon chempionatida oltin medal sohibiga aylandi, Qirg‘izistonda oltin medalni qo‘lga kiritib, O‘zbekiston chempionatida birinchi o‘ringa sazovor bo‘ldi. 

Mohlaroyim Hakimjonova Andijon davlat universitetini bitirgan. U ta’lim muassasasini tamomlagach, Andijon shahridagi 15-maktabda jismoniy tarbiya o‘qituvchisi bo‘lib ishladi.

Bugun u Andijon shahar IIOFMB voyaga yetmaganlar masalalari bo‘yicha bo‘linma inspektor-psixologi lavozimida faoliyat olib bormoqda.

– Albatta, xizmatni mashg‘ulotlar bilan uyg‘unlashtirish oson emas, – deydi inspektor-psixolog, katta serjant Mohlaroyim Hakimjonova. – Lekin jismonan sog‘lom va shay holatda bo‘lish uchun sport bilan shug‘ullanishga vaqt topaman. Chunki 2024-yil yanvar oyida Gretsiyada xalqaro turnir bo‘lib o‘tadi va men avvalgi yutuqlarim sharafini himoya qilish uchun unda ishtirok etishim kerak.

Hakimjonovlar oilasida to‘rt nafar qiz farzand voyaga yetdi, Mohlar­oyim – to‘ng‘ichi. Mohinur viloyat markazidagi maktablardan birida jismoniy tarbiya o‘qituvchisi bo‘lib ishlaydi, Mubina kasb-hunar kollejida tahsil olmoqda, Hojixon esa Andijon shahridagi 1-maktabning 6-sinf o‘quvchisi. Singillari Mohlaroyim bilan faxrlanib, undan o‘rganishga harakat qilishadi.

Boris KLEYMAN,

o‘z muxbirimiz.

Andijon viloyati.