Qahramonimiz Surxondaryo viloyatining Muzrabot tumanida tug‘ilgan. Otasi Qulsaxat aka va onasi Sayyora opa Zavqiddinni to‘ng‘ich o‘g‘illigi tufayli ukalariga g‘amxo‘r, oilada esa yordamchi qilib tarbiyaladilar. Bir kuni u onasiga ro‘zg‘or yumushlarida qo‘maklashayotganida, qo‘shnilarining uyidan quyuq tutun chiqayotganini ko‘rib qoldi. Zavqiddin yugurib ko‘chaga chiqsa, qo‘shni ayol – Zilola opa uyi yonayotganligi, ichkarida to‘rt yoshli o‘g‘li Mansurbek qolganligini aytib, yordam so‘rab har tomonga chopar edi. Zavqiddin zudlik bilan uy ichiga kirib, qichqirib yig‘layotgan Man­surbekni tashqariga olib chiqdi. Shu orada o‘t o‘chiruvchilar yetib kelib, yong‘inni bartaraf etishdi. 

Ushbu voqeadan so‘ng Zilola opa uni qachon ko‘rib qolsa: «Bolam­ning joniga oro kirgan bolam», – deb alqardi. Onasi esa har tongda peshonasidan o‘pib: «Ilohim, elning koriga yaraydigan inson bo‘l!» – deb duo qilardi. Zavqiddin bolaligidan harbiylarga havas bilan qarardi. Sport bilan shug‘ullanishni ham yaxshi ko‘rardi. Hatto o‘smirlar o‘rtasida sportning shotokan karate-do turi bo‘yicha respublikada faxrli 3-o‘rinni egallagandi. 

U 2006-yilda yigitlik burchini o‘tab bo‘lgach, IIV Xalqaro aeroportlarni qo‘riqlash bo‘yicha qo‘shinlari safiga shartnoma asosida xizmatga qabul qilindi. Onasi duo qilganidek, el koriga yarash baxtiga sazovor bo‘ldi. Shunga ham mana, 18 yil bo‘lyapti.  

Hozirda yoshlarga hamda xizmatga yangi qabul qilinganlarga harbiy va jangovar mashinalarga texnik xizmat ko‘rsatish, ularni sozlash, kezi kelganda mohirlik bilan boshqarish sirlarini o‘rgatib kelmoqda. Fidoyiligi, kasb mahorati, xizmatda erishgan yutuqlari uchun Ichki ishlar vazirining qimmatbaho sovg‘alari, «Qo‘shin a’lochisi» ko‘krak nishoni bilan taqdirlangan.

Doniyorbek TURG‘UNOV, 

II darajali serjant.