Foto: Oʻzbekiston Respublikasi Oliy Majlis Senati matbuot xizmati

BMT iqlim oʻzgarishi boʻyicha konferensiyasi (COP28) doirasidagi parlament sessiyasida ishtirok etish uchun Birlashgan Arab Amirliklarida amaliy tashrif bilan boʻlib turgan Oliy Majlis Senati Raisi Tanzila Norboyeva boshchiligidagi delegatsiya Dubay shahridagi “Dubai Expo” markazida tashkil etilgan “Oʻzbekiston” pavilyoni bilan tanishdi.

Oʻzbekiston COP28da Markaziy Osiyo pavilyoni ostida qatnashmoqda. Bu “Bir mintaqa — bir ovoz” pozitsiyasini mustahkamlashga qaratilgan birgalikdagi saʼy-harakat hisoblanadi.

COP28 — Butunjahon iqlim forumida Oʻzbekiston ikkita: koʻk (blue) va yashil (green) pavilyonda ishtirok etmoqda.

Koʻk (“Blue”) zonadagi pavilyonda Oʻzbekistonning ekologik salohiyati, xususan, Prezidentimiz tashabbusi bilan yoʻlga qoʻyilgan va anʼanaga aylangan “Yashil makon” loyihasi, Markaziy Osiyo atrof-muhit va iqlim oʻzgarishlarini oʻrganish universiteti (“Central Asian Green University”) hamda Orol dengizi holati va uni koʻkalamzorlashtirish borasidagi maʼlumotlar oʻrin olgan.

Yashil (“Green”) zonadagi pavilyonda esa ikkinchi qavatda Prezidentimiz tomonidan “Yashil makon”, biologik xilma-xillik, umuman, ekologiya sohasida qilinayotgan ishlar haqida maʼlumotlar, videoroliklar hamda yurtimizning turizm salohiyati namoyish qilinmoqda.