Foto: AFP

Gʻazoda jangovar harakatlarning qayta boshlanganini BMTning Inson huquqlari boʻyicha Oliy komissari Volker Turk tanqid qildi.

“Gʻazo sektorida janglarning qayta boshlanishi — falokat”, deydi inson huquqlari tashkiloti rahbari.

Uning soʻzlariga koʻra, mojaro tomonlariga taʼsir oʻtkazuvchi davlatlar zudlik bilan oʻt ochishni toʻxtatish boʻyicha saʼy-harakatlarini ikki baravar oshirishi kerak. Bu insonparvarlik nuqtayi nazaridan ham, inson huquqlarini taʼminlash uchun ham amalga oshirilishi kerak.

Eslatib oʻtamiz, kecha, 1-dekabr kuni Isroil mudofaa kuchlari harakatni sulh shartlarini buzganlikda ayblab, HAMASga qarshi jangovar harakatlarni davom ettirdi. Oʻz navbatida, HAMAS harbiy harakatlar qayta boshlanganida Isroilni aybladi.

Shu yilning 24-noyabr kuni mojaro tomonlari asirlarni almashish uchun toʻrt kunlik gumanitar tanaffus eʼlon qilgandi. Keyin yana ikki kunga uzaytirilgandi.

Avvalroq, BMT Gʻazo sektori Isroil tomonidan koʻchirilgan aholi sonini maʼlum qilgandi. Unga koʻra, koʻchirilganlar soni 1,8 millionga yetgan, bu anklav aholisining 80 foizini tashkil qiladi.

Yaqin Sharqdagi vaziyat 7-oktyabr kuni Gʻazo sektoridan Isroilga Falastinning HAMAS harakati jangarilarining kirib kelishi, Isroil bilan chegaradosh hududlar aholisining oʻldirilishi va 200 nafardan ortiq, jumladan, bolalar, ayollar va qariyalarning garovga olin olinishi bilan keskin yomonlashdi. HAMAS hujumni Isroilning Quddusdagi Al-Aqso masjidiga qarshi harakatlariga javob deb atadi.

Shundan soʻng Isroil Bosh vaziri Binyamin Netanyaxu mamlakat urush holatida ekanligini eʼlon qildi. Mamlakat mudofaa kuchlarining javob operatsiyasi “Temir qilichlar” deb ataldi va uning maqsadi HAMASni yoʻq qilish hisoblanadi.