Maʼlumotlarga qaraganda, Qoraqalpogʻiston Respublikasida avtomobillar soni joriy yilning 1 dekabr holatiga 197 ming 946 taga, shundan yengil avtomobillar soni 166 ming 511 taga yetgan. Albatta, avtomobillar koʻpayishi yaxshi. Ular xalqimizning turmush sharoitlarini yuksaltirishga, aholining uzogʻini yaqin qilishga xizmat qiladi.

Lekin, avtomobillar soni ortishi bilan yoʻl harakati qoidalarining buzilishi, natijada avariyalar ham koʻpayib borayotgani bor gap. Bu holatlarning sabablari tahlil qilinganida ularning koʻpchiligi piyodalarning harakatlari bilan bogʻliq ekanligi maʼlum boʻlmoqda.

Nukus shahrida Qoraqalpogʻiston Respublikasi Ichki ishlar vazirligi Yoʻl harakati xavfsizligi boshqarmasi tomonidan ommaviy axborot vositalari xodimlari ishtirokida yoʻl transport hodisalarining oldin olish, ayniqsa, piyodalar ishtirokidagi qoidabuzarliklarni aniqlab, ularga yoʻl harakati qoidalarini tushuntirish yuzasidan reyd tadbirlari oʻtkazildi.

Tadbir ishtirokchilari guruhlarga boʻlinib, Nukus shahrida piyodalar tomonidan yoʻl harakati qoidalari koʻproq buzilayotgan oʻrinlarda boʻlib, tadbir davomida piyodalarga tushuntirish va targʻibot tadbirlari olib bordilar.

Tadbir davomida Nukus shahridagi markaziy bozor oldidagi kesishmada piyodalarding yoʻldan bemalol oʻtishi uchun yoʻl osti va yoʻl ustidan ikkita oʻrinda piyodalar oʻtish joylari boʻlishiga qaramay, koʻplab piyodalar yoʻlning taqiqlangan qismidan kesib oʻtganiga guvoh boʻldik.

— Qoraqalpogʻiston Respublikasida joriy yilning 10 oyi davomida jami 367 yoʻl transport hodisasi yuz berdi, — deydi Qoraqalpogʻiston Respublikasi Ichki ishlar vazirligi Yoʻl harakati xavfsizligi boshqarmasining Axborot guruhi katta inspektori, mayor Qalbay Muratov. — Bu oʻtgan yilning shu davriga nisbatan 25 taga kamayganini koʻrsatadi. Yoʻl transport hodisasi natijasida vafot etganlar soni esa, umumiy 75 nafarni tashkil qilib, bu ham 22 taga kamaygan. Lekin, yoʻl-transport hodisalarining sabablari va turlari boʻyicha tahlil qilganimizda, piyodalar bilan bogʻliq holatlar kamaymayapti. Masalan, piyodalarni avtomobillar urib yuborish jami 141 ta holatda yuz berib, bu bittaga koʻpaygan.

Bugungi reyd tadbirlarini ommaviy axborot vositalari vakillari ishtirokida oʻtkazayotganimizning asosiy sababi ham piyodalar orasida yoʻl-qoidalarini kengroq targʻib qilishdir.

Nukus shahrida jurnalistlar ishtirokida oʻtkazilgan reyd tadbirlari davomida yuzga yaqin holatda piyodalar tomonidan qoidabuzarliklar aniqlandi. Ularning koʻpchiligiga yoʻl harakati qoidalari tushuntirilgan boʻlsa, qoʻpol ravishda qoida buzgan piyodalarga nisbatan maʼmuriy bayonnomalar rasmiylashtirildi.

Qoraqalpogʻiston Respublikasi Ichki ishlar vazirligi Yoʻl harakati xavfsizligi boshqarmasi masʼul xodimlari tomonidan yoʻl harakati xavfsizligini taʼminlash va qoidalarni tushuntirishga qaratilgan targʻibot tadbirlari davom etmoqda.

Gʻayrat Otajonov, “Xalq soʻzi”.