Foto: “Xalq soʻzi”

Bu haqda AOKAda oʻtkazilgan brifingda Raqobatni rivojlantirish va isteʼmolchilar huquqlarini himoya qilish qoʻmitasi axborot xizmati rahbari Otabek Usmanov maʼlum qildi.

Respublika boʻyicha mahalliy davlat hokimiyati organlari va davlat boshqaruvi organlarining qabul qilgan jami 165 607 ta (ex-post) normativ-huquqiy va boshqa hujjatlari raqobat toʻgʻrisidagi qonunchilik normalariga muvofiqligi yuzasidan xatlovdan oʻtkazildi. Shundan, 595 ta qonunbuzilish holatlari aniqlangan.

Vazirlik va idoralarning hududiy boshqarmalarida oʻtkazilgan oʻrganishlar tahlil qilinganda Sogʻliqni saqlash boshqarmalari 11 ta, Oʻrmon xoʻjaligi boshqarmalari 6 ta, Madaniyat hamda Veterinariya va chorvachilikni rivojlantirish boshqarmalari tomonidan 2 ta holatda monopoliyaga qarshi qonunchilik hujjatlari talablari buzilishiga yoʻl qoʻyilgan.

Hududlar kesimida qonunbuzilish holatlariga yoʻl qoʻyilgan yuqori koʻrsatgichlar Qoraqalpogʻiston Respublikasida 112 ta, Xorazm viloyatida 102 ta, Jizzax viloyatida 83 ta, Samarqand viloyatida 53 ta, Qashqadaryo viloyatida 46 ta va Sirdaryo viloyatida 37 ta holatni tashkil etadi.