Bugun agentlik binosida davlat mustaqilligining 32 yilligi munosabati bilan “Yangi hayot uchun, Yangi Oʻzbekiston uchun!» degan bosh gʻoyani oʻzida mujassam etgan tadbir boʻlib oʻtdi.

Tadbir avvalida Oʻzbekiston Respublikasining Maktabgacha va maktab taʼlimi vazirining birinchi oʻrinbosari – Maktabgacha taʼlim agentligi direktori A.Shin soʻzga chiqib, “Mamlakatimizning oʻttiz ikki yillik tarixiga nazar tashlaydigan boʻlsak, qisqa davr ichida, ayniqsa uning oxirgi olti yilligida mamlakatimiz ijtimoiy-iqtisodiy hamda siyosiy hayotida tub islohotlar va burilishlar davri boʻlayotganligini sezmoqdamiz. Xususan taʼlim-tarbiya sohasida samarali ishlar amalga oshirilmoqdaki, kelajak avlodni yetuk barkamol shaxs qilib voyaga yetkazish maqsad qilingan.

Mana shu qisqa davr mobaynida mamlakatimizning bosib oʻtgan murakkab yoʻlini, uning erishgan muvaffaqiyatlari-yu, rivojlanishning sekinlashish davrini eslashimiz va bunda taraqqiyotimiz davomida amalga oshirilgan ishlarga, erishilgan natijalarga xolisona baho berishimiz, ushbu natijalar mohiyati va ahamiyatini keng jamoatchilikka yetkazishimiz  va kelajak avlodlarga haqqoniy qilib yetkazishimiz kerak” – deya taʼkidladi.

Shuningdek, A.Shin “Yurtimizga xalqimizga barchamizga mustaqillik muborak boʻlsin” – deya oʻz soʻzini yakunladi.

Shundan soʻng Maktabgacha taʼlim agentligi direktori maslahatchisi X.Buriyev soʻzga chiqdi va quyidagilarni maʼlum qildi:

 Oʻzbekiston Respublikasi Prezidentining “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni oʻtkazish toʻgʻrisida»gi qaroriga muvofiq bugun mamlakatimizda Vatanimizning ijtimoiy-siyosiy, maʼnaviy-maʼrifiy hayotida butunlay yangi davrni boshlab bergan unutilmas tarixiy voqea — Oʻzbekiston Respublikasi davlat mustaqilligining oʻttiz ikki yillik sanasi “Yangi hayot uchun, Yangi Oʻzbekiston uchun!» degan gʻoya negizida baland ruh va koʻtarinki kayfiyat bilan nishonlanmoqda.

Aynan 1991-yil 31-avgust kuni xalqimiz oʻz Vatani, taqdiri va kelajagiga oʻzi egalik qilish huquqini qoʻlga kiritdi. Dunyo xaritasida “Oʻzbekiston Respublikasi” degan yangi suveren va mustaqil davlat paydo boʻldi.

Oʻtgan tarixan qisqa vaqt davomida elimizning fidokorona mehnati va qatʼiyati bilan milliy oʻzligimiz, qadimiy tariximiz, boy madaniyatimiz, ezgu qadriyat va anʼanalarimiz qayta tiklandi, davlat va jamiyat hayotining tub asoslari oʻzgarib, mamlakatimiz dunyo hamjamiyatida oʻzining munosib oʻrniga ega boʻldi.

Qarorda keng koʻlamli islohotlarimizni izchil davom ettirish, barcha soha va tarmoqlar rivojini yangi bosqichga olib chiqish maqsadida bugungi kunda yurtimizda millati, tili va dinidan qatʼi nazar, har bir fuqaro erkin va farovon yashaydigan yangi jamiyat va davlat barpo etilayotganligi alohida qayd qilingan.

Chindan ham bugungi kunda mamlakatimiz siyosiy hayotidagi muhim voqealar, xususan, yangilangan Konstitutsiyamizning qabul qilinishi el-yurtimiz Yangi Oʻzbekistonni, Uchinchi Renessans poydevorini yaratishga qaratilgan islohotlarni har tomonlama qoʻllab-quvvatlab kelayotganini yana bir bor yaqqol tasdiqladi.

Tadbir yakunida yurtimizda hukm surayotgan tinch va osuda hayotni asrash, uning mustaqilligi va barqarorligiga munosib hissamizni qoʻshish – har birimizning, shu aziz Vatanda yashayotgan barcha fuqarolarning, davlat yoki jamoat tashkilotida ishlashi, tadbirkor yoki boshqa kasb egasi boʻlishidan qatʼiy nazar, eng asosiy vazifalaridan boʻlib qolmogʻi lozimligi taʼkidlandi.