Foto: Xalq so‘zi

Mamlakatimizning barcha joylarida boʻlgani kabi Samarqand viloyatida ham Xalqaro xotin-qizlar kuni koʻtarinki ruhda nishonlanmoqda.

Viloyatda turli sohalarda mehnat qilib, jamiyat rivojiga hissa qoʻshayotgan, jamoatchilik oʻrtasida hurmat-eʼtibor qozongan faol xotin-qizlar, namunali oila bekalari, tabarruk onaxonlar jam boʻlgan asosiy bayram tadbirida ularga ehtirom koʻrsatildi.

Tadbirda Samarqand viloyat hokimi Erkinjon Turdimov soʻzga chiqib, bayram qatnashchilarini va ular timsolida barcha xotin-qizlarni bayram bilan qutlab, iliq tilaklarini bildirdi.

— Hayotimizni opa-singillarimizning oila va jamiyatdagi faol ishtirokisiz tasavvur etib boʻlmaydi. Bugungi kunda viloyatdagi 1 ming 359 nafar xotin-qizlar turli tashkilot va muassasalarni boshqarib kelmoqda. Bundan tashqari sanoat, iqtisod, qishloq xoʻjaligi, savdo, xalq taʼlimi, sogʻliqni saqlash, madaniyat, sanʼat va boshqa sohalarda besh ming nafarga yaqin fidoiy ayollar faoliyat koʻrsatyapti, — dedi viloyat rahbari. — Har yilgi anʼanaga koʻra, ushbu bayram arafasida davlatimiz rahbarining Farmoniga asosan viloyatning 6 nafar fidoiy xotin-qizlari yuksak davlat mukofotlari bilan taqdirlandilar. Bugun ularni yana bir bor samimiy muborakbod etamiz.

Bayram tadbirida bir guruh opa-singillarimizga «Moʻtabar ayol» koʻkrak nishoni topshirildi. Shuningdek, oʻz intilishi, isteʼdodi, insoniy fazilatlari bilan jamiyatda munosib oʻrniga ega boʻlgan xotin-qizlarning bir guruhiga viloyat hokimining faxriy yorliq va esdalik sovgʻalari topshirildi.

El ardogʻidagi sanʼatkorlarning chiqishlari davraga yanada fayz bagʻishladi.

Viloyatning barcha shahar va tumanlarida, mehnat jamoalarida Xalqaro xotin-qizlar kuni tantanalari davom etmoqda.

Abdulaziz YOʻLDOSHEV, «Xalq soʻzi».