Oʻzbekiston Respublikasi Oliy Majlisi Qonunchilik palatasining navbatdagi majlisi boʻlib oʻtmoqda. Unda “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Konstitutsiyaviy qonun loyihasining umumxalq muhokamasi yakunlari asosida Konstitutsiyaviy qonun loyihasini takomillashtirish boʻyicha olib borilayotgan ishlar muhokama qilinmoqda.

Kun tartibidagi masala yuzasidan parlament quyi palatasining Korrupsiyaga qarshi kurashish va sud-huquq masalalari qoʻmitasi raisi J.Shirinov axborot beryapti.

Taʼkidlanganidek, Asosiy qonun ijtimoiy-siyosiy hayotimizning huquqiy asosi boʻlib, u ozod va suveren davlatning huquqiy asosini yaratish bilan birga, jamiyatimizning huquqiy taraqqiyotida yangi davrni boshlab berdi. Oʻtgan davrda Konstitutsiyamizga kiritilgan oʻzgartish va qoʻshimchalar aholi farovonligini yanada oshirishda, davlat va jamiyatning har tomonlama rivojlanishida va hayotning barcha sohalarini liberallashtirishda muhim omil boʻlib xizmat qilmoqda.

Xalqimiz bilan bamaslahat ishlab chiqilgan kelgusi besh yillikning bosh muhim hujjati — Taraqqiyot strategiyasida belgilangan xalqparvar davlatni barpo etish, inson huquq va manfaatlari, qadr-qimmatini yanada samarali taʼminlash kabi maqsadlar mamlakatimizdagi tub islohotlarga mos yangi konstitutsiyaviy-huquqiy makonni yaratish zaruratini yuzaga keltirdi.

Shundan kelib chiqib, Konstitutsiyaviy islohotlarni oʻtkazish bilan bogʻliq ishlarning samarali va puxta amalga oshirilishini taʼminlash maqsadida Konstitutsiyasiga oʻzgartish va qoʻshimchalar kiritish yuzasidan takliflarni shakllantirish va tashkiliy chora-tadbirlarni amalga oshirish boʻyicha Konstitutsiyaviy komissiya tuzildi va mamlakatda amalga oshirilayotgan siyosiy jarayonda har bir fuqaroning oʻz fikr-mulohalarini, takliflarini bildirishi uchun barcha qulayliklar yaratib berildi.

Xususan, deputatlar tomonidan hududlarga chiqilgan holda davlat organlari, fuqarolarning oʻzini oʻzi boshqarish organlari, korxonalar, muassasalar va tashkilotlarda fuqarolar ishtirokida qator uchrashuvlar tashkil etilib, konstitutsiyaviy islohotlarning mazmun-mohiyati va ahamiyatini keng jamoatchilikka tushuntirish ishlari olib borildi.

Umumxalq muhokamasi davomida Konstitutsiyaviy qonun loyihasi yuzasidan aholidan hamda fuqarolik jamiyati institutlaridan jami 150 mingdan ortiq taklif va fikr-mulohaza kelib tushgan boʻlib, ularning katta qismi oʻrganildi va Konstitutsiyaviy qonun loyihasida oʻz aksini topmoqda.