2022-yilda Toshkent shahridagi ko‘chalarni tartibga keltirish (ta’mirlash) rejasiga muvofiq, 14-fevral kuni Alisher Navoiy ko‘chasida ta’mirlash ishlari boshlangandi. “Daryo” muxbirining xabar berishicha, ta’mirlash ishlari olib borilayotgan shohko‘chaning Abay ko‘chasi bilan kesishmasidagi yo‘lda tramvay yo‘li relslari chiqib kelgan.

Aftidan, relslar to‘liq olib tashlanmasdan, yo‘lni asfaltlash davomida shunchaki ko‘mib tashlangan.

Poytaxt hokimligi bergan xabarga ko‘ra, shohko‘cha tirbandliklarni kamaytirish, haydovchilar hamda piyodalarga qulaylik yaratish maqsadida rekonstruksiya qilinadi. Bunda Navoiy—Labzak ko‘chasidan Navoiy—Beruniy ko‘chalarigacha bo‘lgan oraliq butkul ta’mirlanishi rejalashtirilgan.

Eslatib o‘tamiz, 2016-yilning 2-may kuni Toshkentda harakatlanayotgan so‘nggi tramvay yo‘nalishi — “Beshqayrag‘och” dahasi va Otchopar o‘rtasida qatnovchi 17-yo‘nalish yopilgan va shu tariqa Toshkent tramvayining 115 yillik tarixiga nuqta qo‘yilgandi.

2022-yilning yanvar oxirlarida telejurnalist Xayrulla Nuriddinov “O‘zbekiston 24” telekanalida efirga uzatilgan “Menimcha” ko‘rsatuvida Toshkentga tramvay qatnovini qaytarish tarafdori ekanini aytib o‘tgan edi.

“Shahar transporti mavzusi ochilganligidan foydalanib, yana bir taklifni aytmoqchiman. Aholiga qulay va sifatli transport xizmatini ko‘rsatish sohasini takomillashtirish maqsadida Toshkentga tramvaylarni qaytarish kerak, menimcha. Katta va gavjum shaharga tramvay juda asqatadi. Hammamizning esimizda-ku, o‘sha qulay, bejirim, bir tekisda yuradigan, muhimi, ekologiyaga zarar yetkazmaydigan qadrdon tramvaylarimiz. Bilmadim, balki xato qilayotgandirman, lekin bu mening shaxsiy fikrim. Agar poytaxt mutasaddilarining o‘rnida bo‘lganimda, ana shu tashabbus bilan chiqqan bo‘lardim”, — degandi Xayrulla Nuriddinov.

Shavkat Mirziyoyev 10-fevral kuni Samarqand viloyatiga tashrifida “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — deb qayd etgandi.