Toshkent metropolitenida 23-fevraldan boshlab ona va bola xonasi hamda hojatxona foydalanishga topshirilishi to‘g‘risida xabar berilgandi. Bugun, 23-fevral kuni Toshkent metropolitenining “Chilonzor” bekatida ona va bola xonasi hamda hojatxona foydalanishga topshirildi. Bu haqda “Daryo” muxbiri xabar bermoqda.

“Underground servis” MChJ xodimi Tanzila Yusupovaning so‘zlariga ko‘ra, hojatxona hamda ona va bola xonasidan foydalanish narxi 1 500 so‘mni tashkil qiladi.

Uning ta’kidlashicha, hojatxona sinov tariqasida qurilgan bo‘lib, kelgusida gavjum, yo‘lovchilar oqimi ko‘p bo‘lgan “Paxtakor”, “Buyuk ipak yo‘li” va boshqa bekatlarda qurilishi rejalashtirilgan.

Shuningdek, Ikkinchi jahon urushi qatnashchilari, nogironligi mavjud fuqarolar, Chernobil falokati ishtirokchilari, Huquqni muhofaza qiluvchi organ xodimlari va Yoshlar Ittifoqi yetakchilari hamda 7 yoshgacha bo‘lgan bolalar metropoliten hojatxonasidan bepul foydalanishi mumkin.

Eslatib o‘tamiz, “Daryo”da Toshkent metropolitenida sodir bo‘layotgan nosozliklar, ko‘rsatilayotgan xizmatlar sifati, qulaylik va kamchiliklar to‘g‘risidagi “Kassalarda navbat, tibbiy yordam ololmaysan, bekatlarni nomi emas, o‘rindiqlariga qarab ajratasan. Toshkent metrosiga nimalar yetishmayapti?” sarlavhali maqola e’lon qilingandi. Toshkent metropoliteni maqolaga munosabat bildirgan. Unda “Chilonzor” metro bekatida tajriba tariqasida hojatxona qurish ishlari olib borilayotgani, agarda bu o‘zini oqlasa, boshqa bekatlarda ham amalda tatbiq etilishi aytilgandi.