Sobiq Prezident Jeenbekov sudga chaqirildi

Qirg'izistonning sobiq Prezidenti Sooronbay Jeenbekov sobiq amaldor Duyshenbek Zilaliyev ishi bo'yicha ko'rsatma berish uchun sudga chaqirildi.

Zilaliyev noqonuniy boylik orttirishda ayblanyapti. Milliy xavfsizlik davlat qo'mitasi uning bankdagi seyfidan 1 mln dollar topilganini maʻlum qildi.

Sobiq amaldorning advokatiga ko'ra, bu pullar Sooronbay Jeenbekovning saylovoldi kampaniyasi uchun tadbirkorlardan yig'ilgan.

Jeenbekorv yaqingacha Prezident bo'lgani uchun sud uni so'roq qilmayotgandi. Ammo himoyalanuvchi tomon qatʻiy talab qilgach, sobiq davlat rahbari sudga chaqirildi.

Biroq sobiq Prezident sudga kelmasligi ham mumkin. Qonunga ko'ra, uning maqomi sudga majburan olib kelishga yo'l qo'ymaydi.

Sooronbay Jeenbekovning advokati uning mijoziga tuhmat qilishayotganini aytdi. U sobiq Prezidentning bu ishga hyech qanday aloqasi yo'qligini taʻkidlamoqda.

Avvalroq, 2020 yilning 5 oktyabr kuni Bishkekdagi namoyishni tarqatsh vaqtida jabrlanganlar Sooronbay Jeenbekovni jazolashni talab qilib chiqqani haqida xabar bergan edik.