O'zbekistonning korruptsiya bo'yicha xalqaro reytingdagi o'rni maʻlum bo'ldi

Transparency International 2020 yilgi Korruptsiyani qabul qilish indeksini eʻlon qildi.

Transparency International korruptsiyaga qarshi kurashish xalqaro nodavlat tashkiloti Korruptsiyani qabul qilish indeksining 2020 yil reytingini ishlab chiqdi. 

Korruptsiyaga qarshi kurashish agentligi xabariga ko'ra, O'zbekiston reytingda o'z o'rnini 7 pog'onaga o'zgartirib, 180 davlat orasida 146-o'rinni egalladi (2019 yilda 153-o'rin). 

Korruptsiyani qabul qilish indeksi davlat sektorida korruptsiya darajasi bo'yicha ekspertlar va tadbirkorlar baholari asosida 0dan (korruptsiyani qabul qilishda eng yuqori ko'rsatkich) 100ga qadar (eng past) shkala bo'yicha hisob-kitob qilinadi.

Shu bilan bir qatorda, reytingda O'zbekiston 26 ballni qayd etdi.

Korruptsiyani qabul qilish indeksi davlat sektorida korruptsiya darajasini aks ettirib, uni ishlab chiqishda qator manbalardan, shu jumladan, ekspertlar baholari va ishbilarmon doiralar vakillari o'rtasida o'tkazilgan so'rovnomalardan foydalaniladi.

Reytingda 88 ball bilan Daniya va Yangi Zelandiya yetakchilikni qo'lga kiritdi. Top-10 reytingdan Finlandiya, Singapur, Shvetsiya va Shveytsariya (85 balldan), Norvegiya (84), Niderlandiya (82), Germaniya va Lyuksemburg (80dan) ham joy oldi. 

Eng yomon ko'rsatkichni Somali, Janubiy Sudan (12 balldan), Suriya, (14 ball), Yaman va Venesuela (15 balldan) qayd etdi.