Amsterdamda bir nechta portlash sodir boʻldi

Foto: Reuters

Joriy yilning 5-iyunga oʻtar kechasi Amsterdam shimolida ketma-ket uchta portlash sodir boʻldi. Bu haqda Niderlandiya radioeshittirish korporatsiyasi (NOS) xabar bermoqda.

Korporatsiya maʼlumotlariga koʻra, shahar shimolida, mahalliy vaqt bilan soat 03:15 — 03:50 oraligʻida uchta portlovchi qurilma harakatga keltirilgan.

Aniqlik kiritilishicha, hech kim jabrlanmagan. Birinchi portlashdan keyin yongʻin boshlangan, biroq mutaxassislar yongʻinni oʻchirishga muvaffaq boʻlgan.

Voqea joyida portlashlardan biriga aloqadorlikda gumon qilinayotgan 21 yoshli yigit qoʻlga olingan. Uning shaxsi haqida tafsilotlar berilmagan. Politsiya, shuningdek, uch voqea oʻrtasidagi aloqalarni ham tekshirmoqda.