Farg‘onadan kuniga 400 tonna gilos eksport qilinmoqda

Foto: «Xalq so‘zi»

Farg‘ona viloyatida Quva tumani va Quvasoy shahrida gilosning deyarli barcha navlarini yetishtirish yaxshi yo‘lga qo‘yilgan. Shuningdek, Uchko‘prik, O‘zbekiston va Oltiariq tumani qir-adirliklaridehqon xo‘jaliklariga berilishi natijasida ushbu hududlarda ham yildan-yilga gilos yetishtirish yaxshi rivojlanayotir.

2022 yili viloyatda 12 davlatga umumiy qiymati 17,8 million dollarlik 12,4 ming tonna gilos eksport qilingan edi. Eksport ulushi assoan Rossiya, Qozog‘iston, Polsha, BAA, Xitoy, Koreya Respublikasi hissasiga to‘g‘ri keldi.

Ayni paytda Farg‘ona viloyati bojxona boshqarmasining “Vodiy” hamda “Marg‘ilon” tashqi iqtisodiy faoliyat bojxona postlariga qarashli ikkita “Eksportga ko‘maklashish markazi” faoliyat yuritmoqda. Bu markazlarda eksportga ortilayotgan mahsulotlarga zarur bo‘ladigan hujjatlar taqdim etadigan barcha idoralar xizmati yo‘lga qo‘yilgan. Bojxona xodimlari tomonidan eksport qilinayotgan gilosga tegishli yuk kuzatuv hujjatlari shu yerning o‘zida rasmiylashtirib berilmoqda. Tadbirkorlar tomonidan giloslar bo‘yicha taqdim etilayotgan bojxona yuk deklarasiyalari onlayn shaklda boshqarmaning “Masofaviy elektron deklarasiyalash” bojxona posti xodimlari tomonidan o‘z vaqtida rasmiylashtirilishi ta’minlanyapti.

Farg‘ona viloyati bojxona boshqarmasi axborot xizmati rahbari Shavkatjon Sotivoldiyevning “Xalq so‘zi” muxbiriga xabar berishicha, 2023 yilning o‘tgan davrida qiymati 4 million dollarga yaqin 4750 tonnadan ortiq gilos mahsulotlari eksport qilindi. Mavsumda kuniga o‘rtacha 400 tonna gilos eksportga yo‘naltirilmoqda.

Botir Madiyorov, “Xalq so‘zi”.