Ukraina Prezidenti Vladimir Zelenskiy, Bosh vazir Denis Shmigal va Oliy Rada spikeri Ruslan Stefanchuk bugun, 1 iyul kuni Evropa Ittifoqiga to'laqonli aʻzolikka erishish bo'yicha Qo'shma bayonotni imzoladilar. 

Oliy Rada yig'ilishida imzolangan hujjat strategik maqsad – Ukrainaning EIga aʻzo bo'lishiga erishishga qaratilgan. 

"Bugun biz qo'shma bayonotni imzolayapmiz, bu hukumatning barcha bo'g'inlari birligidan dalolat beradi va Ukrainaning Evropa Ittifoqiga to'laqonli aʻzo bo'lish strategik maqsadiga erishish yo'lidagi qatʻiyligimizdan dalolatdir", deydi Zelenskiy Oliy Rada minbaridan turib. 

Davlat rahbariga ko'ra, bu bayonotning imzolanishi urushning beshinchi kunida Evropa Ittifoqiga kirish to'g'risidagi arizaning imzolanishi bilan bir xil maʻnoga ega. 

"Evropa Ittifoqiga nomzod maqomini olish uchun bizga 115 kun kerak edi. To'liq aʻzolik yo'limiz o'nlab yillar davom etmasligi kerak. EIdagi do'stlarimiz yana bir tarixiy qarorni tezroq qabul qilishlari uchun biz o'z ishimizni beg'araz bajarishimiz kerak", deydi Zelenskiy. 

Ukraina rahbari mamlakatni EIga aʻzolik bo'yicha muzokaralar boshlanishiga jadal va masʻuliyat bilan tayyorlash zarurligini taʻkidladi. 

"Bu zaldagi Evropa Ittifoqi bayrog'i barchamizning, davlatning barcha idoralarining burchining ramzidir", deydi Zelenskiy. 

Prezident Ukrainaning EIga aʻzo bo'lishi nafaqat geosiyosiy maqsadni ko'zlashini, balki har bir oila va kompaniyaga maʻlum foyda keltirishini taʻkidladi.

Ukraina Prezident Vladimir Zelenskiy 6 iyun kunidagi murojaati chog'ida Ukraina yaqin haftalarda o'z nomzodligi bo'yicha Evropa Ittifoqning qarorini kutayotganini aytgandi.

28 fevral kuni Vladimir Zelenskiy Ukrainaning Evropa Ittifoqiga qo'shilishi haqidagi arizani imzoladi. 

21 mart kuni Evropa komissiyasi Ukrainaning EIga aʻzoligi bo'yicha ish boshlaganini maʻlum qildi. Evrokomissiyaning tavsiyasi bilan Evropa Ittifoqi Kengashi qaror qabul qiladi.

8 aprel kuni Evrokomissiya rahbari Ursula fon der Lyayen Kiyevga tashrifi chog'ida Prezident Vladimir Zelenskiyga Ukrainaning Kopengagen mezonlariga muvofiqligi haqidagi so'rovnomani topshirdi – bu Evropa Ittifoqiga  aʻzolikka nomzod maqomini olish uchun zarur qadam bo'ldi.