Hindistonning Kalkutta shahrida shaxmat boʻyicha 'Tata Steel Chess India' turniri boʻlib oʻtmoqda. Unda hamyurtimiz, Oʻzbekistonning birinchi raqamli shaxmatchisi Nodirbek Abdusattorov ham ishtirok etmoqda.

Qayd etish kerakki, oʻz tarixida oltinchi bor oʻtkazilayotgan nufuzli musobaqaning mukofot jamgʻarmasi 41 ming 500 AQSH dollarini tashkil etadi. Turnir 9 tur rapid (25+10) va 18 tur blis (3+2) yoʻnalishida oʻtkaziladi.

Rapid va blis yoʻnalishlari uchun alohida gʻolib aniqlanadigan 'Tata Steel Chess India' turnirida Magnus Karlsen ham ishtirok etyapti. Nodirbek birinchi kungi bahslardan soʻng turnir jadvalida yakka peshqadam boʻlib oldi. U kecha oʻtkazilgan 3 ta partiyaning 2 tasida gʻalaba va birida durang natija qayd etdi.



Nodirbek avvaliga FIDE bayrogʻi ostida harakat qilayotgan rossiyalik Danil Dubov bilan murosaga keldi. Keyin esa germaniyalik Vinsent Keymer hamda hindistonlik Rameshbabu Pragnanandhani magʻlubiyatga uchratdi.

Bugun esa yana 3 ta mezbon sportchiga qarshi dona suradi. Nodirbek 4-turda qora donalarda Nihal Sarin (Hindiston, 2679)ga qarshi bahs olib boradi. Beshinchi turda oq donalarda yana bir hind grossmeysteri Vidit Santosh Gujrathi (2661) bilan hisob-kitob qiladi. Kunni Sunildat Narayanan (Hindiston, 2579)ga qarshi qora donalardagi uchrashuv bilan yakunlaydi.