Hozirda 87 ta davlat 53 ta tanlab olingan mahsulotni qoʻllab-quvvatlash boʻyicha OCOP tashabbusiga qoʻshildi. Gilosning Oʻzbekistonda oziq-ovqat xavfsizligini mustahkamlash, kichik fermerlarni qoʻllab-quvvatlash va barqaror qishloq xoʻjaligi amaliyotini targʻib qilishdagi rolini inobatga olgan holda, u Oʻzbekistonning ustuvor mahsuloti sifatida tanlandi.



Yaqinda OCOP tashabbusini amalga oshirish boʻyicha Milliy ishchi guruhini qoʻllab-quvvatlash maqsadida Texnik ishchi guruhining (TIG) birinchi yigʻilishi boʻlib oʻtdi. Unda Oʻzbekiston Respublikasi Qishloq xoʻjaligi vazirligi, Agrosanoat majmuini rivojlantirish agentligi, Oʻsimliklar karantini va muhofazasi agentligi, shuningdek, akademik Mahmud Mirzayev nomidagi Bogʻdorchilik, uzumchilik va vinochilik ilmiy-tadqiqot instituti vakillari ishtirok etdi. Bundan tashqari, yigʻilishda xususiy agrobiznes kompaniyalari va Yevropa Ittifoqi qishloq xoʻjaligini qoʻllab-quvvatlash dasturi vakillari ham qatnashdilar. Yigʻilish ishtirokchilarining eʼtibori gilos uchun barqaror qiymat zanjirini yaratishga qaratildi. Bu kichik fermerlarga foyda keltiradi, mahalliy iqtisodiyotni mustahkamlaydi va atrof-muhitni muhofaza qiladi.

Uchrashuv davomida ishtirokchilar Oʻzbekistondagi OCOP boʻyicha TIG tarkibi va vazifalari yuzasidan kelishib oldilar. Bu guruh davlat organlari, fermerlar assotsiatsiyalari, xususiy sektor va ilmiy-tadqiqot institutlari oʻrtasidagi hamkorlikni yoʻlga qoʻyadi, shuningdek, OCOP tashabbusini amalga oshirishni muvofiqlashtiradi.



FAO tomonidan asos solingan global OCOP tashabbusi mamlakatlarga oziq-ovqat xavfsizligi va toʻyib ovqatlanmaslik muammolarini hal qilish, shuningdek, mahalliy iqtisodni koʻtarish uchun geografik koʻrsatkichlar va mahalliy madaniy meros orqali kelib chiqqan mamlakatlari bilan bogʻlangan tanlab olingan qishloq xoʻjaligi mahsulotlari uchun barqaror yetkazib berish zanjirlarini yaratishda yordam berishga qaratilgan. Ushbu tashabbus FAOning 2022'2031-yillarga moʻljallangan strategik dasturiga mos keladi va BMTning Barqaror rivojlanish maqsadlariga erishishni qoʻllab-quvvatlaydi. Hozirda Yevropa va Markaziy Osiyoda 11 ta davlat, jumladan, Albaniya (kashtan), Ozarbayjon (anor), Qozogʻiston (olma) va Turkiya (anjir) tanlab olingan qishloq xoʻjaligi mahsulotlarini targʻib qilmoqda.