Pentagon matbuot kotibi Sabrina Singxga koʻra, dushanba kuni Rossiya sharqiga mashgʻulotlar uchun yuborilgan Shimoliy Koreyaning 10 000 askaridan baʼzilari Ukraina chegarasiga yaqinlashgan. AQSH oʻtgan hafta ular sonini 3 mingtagacha baholagan edi.

'Bu askarlarning bir qismi allaqachon Ukrainaga yaqinlashgan va biz Rossiya ulardan jangovar harakatlarda yoki Rossiyaning Ukraina bilan chegarasi yaqinidagi Kursk viloyatida Ukraina kuchlariga qarshi jangovar operatsiyalarda yordam berishidan xavotirdamiz', ' deydi Singx jurnalistlarga.

Janubiy Koreya prezidenti Yun Sok Yol seshanba kuni Shimoliy Koreya harbiylarining joylashtirilishi uning mamlakati milliy xavfsizligiga ham, xalqaro hamjamiyatga ham tahdid solayotganini aytib, Rossiya va Shimoliy Koreya oʻrtasidagi noqonuniy harbiy hamkorlikni qoralagandi.

NATO Bosh kotibi Mark Ryutte dushanba kuni Shimoliy Koreya askarlarining joylashtirilishi Ukraina mojarosining sezilarli keskinlashuvi va Rossiya urushining xavfli kengayishi ekanligini taʼkidlagan edi.

'Rossiya va Shimoliy Koreya oʻrtasidagi chuqurlashib borayotgan harbiy hamkorlik Hind-Tinch okeani va Yevro-Atlantika xavfsizligiga tahdiddir', ' dedi Ryutte.

Shimoliy Koreya tashqi ishlar vazirligi rasmiysi OAVning Rossiyaga qoʻshin kiritilishi haqidagi xabarlarini tasdiqlamadi, biroq agar Pxenyan shunday chora koʻrgan boʻlsa, bu xalqaro normalarga mos kelishiga ishonishini aytdi.

Moskva dastlab Shimoliy Koreyaning Ukrainaga qarshi urushida ishtiroki haqidagi xabarlarni 'soxta xabar' deb rad etdi. Ammo Rossiya prezidenti Vladimir Putin Shimoliy Koreya qoʻshinlari Rossiyada ekanligini inkor etmadi va bu Pxenyan bilan hamkorlik shartnomasini qanday amalga oshirgani ichki masala ekanini qayd etdi.

Rossiya tashqi ishlar vaziri Sergey Lavrov dushanba kuni Ryuttening izohlarini rad etdi va Pxenyan hamda Moskva shu yilning iyun oyida qoʻshma xavfsizlik shartnomasini imzolaganini taʼkidladi.

Manbalarga koʻra, AQSH Mudofaa vaziri Lloyd Ostin va Davlat kotibi Entoni Blinken shu hafta oxirida Vashingtonda janublik hamkasblari bilan uchrashib, Shimoliy Koreyaning Ukrainadagi aralashuvini muhokama qiladi.

'Agar biz Shimoliy Koreya qoʻshinlarining front chizigʻi tomon harakatlanayotganini koʻrsak, ular urushda sheriklardir. Ularga qarshi AQSH tomonidan taqdim etilgan qurollardan foydalanishda hech qanday cheklovlar boʻlmaydi', ' deydi Singx

Janubiy Koreyaning 'Yonhap' milliy axborot xizmati xabar berishicha, prezident Yun Sok Yol mamlakat vazirlar mahkamasi yigʻilishida Shimoliy Koreyaning Rossiya bilan harbiy hamkorligi fonida mamlakat barcha imkoniyatlarni sinchkovlik bilan baholab, qarshi choralar koʻrishi kerakligini aytgan.

Ukraina tashqi ishlar vaziri Andriy Sibixaning aytishicha, Kiyev bir necha haftadan beri Shimoliy Koreya askarlarining joylashtirilishi haqida ogohlantirib kelgan va ittifoqchilarni keskin javob qaytara olmaganlikda ayblagan. Shuningdek, u Rossiyaga qarshi uzoq masofali zarbalar berishdagi cheklovlarni olib tashlashga chaqirdi. Biroq, AQSH Ukrainaning Rossiya hududiga chuqur zarba berish uchun qurol ishlatish haqidagi iltimosini maʼqullashi haqida hech qanday maʼlumot bermadi.