Odilbek Odamboyev/'Xalq soʻzi'. Yaqinda Vengriyaning Budapesht shahrida oʻtkazilgan Butunjahon shaxmat olimpiadasida Oʻzbekiston erkaklar terma jamoasi 189 ta jamoa orasida 3-oʻrinni egalladi. Bu yurtimizda sportning shaxmat turiga, iqtidorli yosh shaxmatchilarni tarbiyalashga qaratilayotgan eʼtibor natijasidir. 'Aql gimnastikasi' deb taʼrif beriladigan ushbu sport turini rivojlantirish borasida Xorazm viloyatida amalga oshirilayotgan ishlar tahsinga loyiq. Viloyatda mamlakatimiz Prezidentining 2021-yil 14-yanvardagi 'Shaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari toʻgʻrisida'gi qarori ijrosi doirasida oʻsib kelayotgan yosh avlodni sportning ushbu turiga qiziqishlarini oshirish va intellektual salohiyatini yuksaltirish, 'maktabda shaxmat' loyihasini amalga oshirish maqsadida viloyatdagi umumiy oʻrta taʼlim maktablariga 5700 dona shaxmat taxtalari topshirildi. Maktablarda maxsus shaxmat xonalari tashkil qilinib, mashgʻulotlarga taniqli grossmeysterlar jalb qilinmoqda.



' Maktabimizda shaxmat toʻgaragi uchun maxsus xona tashkil qilib oʻquv qoʻllanmalari, shaxmat taxtasi, soati va boshqa zarur anjomlar bilan jihozladik, ' deydi Urganch shahridagi 29-sonli maktab direktori Azamat Madaminov. 'Boshlangʻich sinflarga jismoniy tarbiya darslarida shaxmat sirlari ham oʻrgatilmoqda. Taniqli grossmeysterlarni taklif qilgan holda oʻtkazilayotgan 'Shaxmat haftaligi' tadbirlari oʻquvchilarimizda shaxmatga boʻlgan qiziqishni yanada oshirmoqda.

' Maktablarda shaxmat sportini rivojlantirish borasida amalga oshirilayotgan ishlar yaqin kelajakda albatta, oʻz samarasini beradi, ' deydi taniqli grossmeyster, shaxmat boʻyicha Oʻzbekiston milliy terma jamoasi aʼzosi Nodirbek Yakubboyev. ' Taʼlim maskanlarida oʻtkazilayotgan shaxmat turnirlari mehmoni sifatida qatnashib, yoshlarga ragʻbat berayotganimdan xursandman.



Joriy yilda Oʻzbekiston shaxmat federatsiyasi tomonidan oʻtkazilgan mamlakat chempionatlarida Xorazm viloyati vakillari 6 ta oltin, 6 ta kumush va 8 ta bronza medallarni qoʻlga kiritdi. Xiva shahrida har yili al-Beruniy xalqaro shaxmat turniri va 'Turizm va shaxmat' haftaligini oʻtkazish anʼanaga aylangan. Shaxmat sirlarini oʻrganish borasida yoshlar uchun yaratilayotgan imkoniyatlar kelgusida xalqaro turnirlarda medallar shodasi yanada kengayishiga xizmat qiladi.