Saminjon HUSANOV/'Xalq soʻzi'. Mamlakatimizda yer maydonlaridan foydalanish, ulardagi binolarni barpo etish, chegaralarini belgilash borasida maʼlum tartiblar ishlab chiqilgan boʻlsa-da, joylarda bu qoidalarga rioya etmaydiganlar hanuz uchrab turibdi. Buloqboshi tumanidagi 'Nur zamin' MFYda yashovchi Abdumannob Sodiqov oʻzi istiqomat qilayotgan hovliga yondosh hududda boʻlgan, tuman hokimligi zaxirasidagi yer maydonini oʻzboshimchalik bilan egallab olgan va bino qurgan. Shu tumanning 'Qum guzar' MFYda yashovchi Anvar Toshmatov ham oʻziga tegishli boʻlmagan maydonda qurilish ishlarini amalga oshirganligi aniqlandi.



Bu holatni Shahrixon tumanida ham uchratish mumkin. 'Tumor' mahallasida istiqomat qiluvchi Azizbek Holmatov 'Sahovat teks' MCHJga tegishli 300,0 kv. metr ekin maydonini oʻzboshimchalik bilan egallab olgani yetmaganidek bino ham barpo etgan.

' Afsuski, bunday holatlar har bir tumanda mavjud, ' deydi Kadastr agentligi Andijon viloyati boshqarmasi xodimi Bunyodbek Abduvaliyev. ' Tahlillar shuni koʻrsatmoqdaki, noqonuniy oʻzlashtirib olingan yer maydonining asosiy qismi qishloq xoʻjaligi hududlariga tegishli boʻlib, joriy yilning shu davriga qadar 484 ta holatda 181,9 gektar maydon talon-taroj qilingan.

Aytish joiz, viloyatda yilning oʻtgan davri mobaynida 4 ming 583 ta holatda 335,1 gektar yer maydoni oʻzlashtirilgan. Noqonuniy binolarni buzish, yer maydonini oʻz egasiga qaytarish yuzasidan tegishli chora-tadbirlar koʻrilmoqda.